তিনিচুকীয়া,7 জুলাই : দুৰ্নীতিৰ বিৰুদ্ধে যিমানেই কঠোৰ হৈছে ৰাজ্য চৰকাৰ সিমানেই ৰাজ্যৰ বিভিন্ন প্ৰান্তত সংঘটিত হোৱা দুৰ্নীতিৰ তথ্য পোহৰলৈ আহিছে প্ৰতিদিনে ৷ একপ্ৰকাৰে যেন মুখ্যমন্ত্ৰীৰ নিৰ্দেশকো কেৰেপ নকৰে ৰাজ্যৰ একাংশ বিষয়া-কৰ্মচাৰীয়ে ৷ এইবাৰ তেনে এক ঘটনাই পোহৰলৈ আহিছে তিনিচুকীয়া জিলাত ৷ জিলাখনৰ পানীতোলা গাঁও পঞ্চায়তত উৎকোচ লৈ হাতে-লোটে ধৰা পৰিল পঞ্চায়ত সচিব মৃদুপৱন চেতিয়া ।
অভিযোগ অনুসৰি, পঞ্চায়তখনৰ সচিব মৃদুপৱন চেতিয়াই তিনিজন যুৱকৰ পৰা স্থানীয় বাসিন্দাৰ প্ৰমাণপত্ৰ দিয়াৰ বিনিময়ত ৫০০ টকা উৎকোচ বিচাৰিছিল ৷ তাৰপাচতে যুৱককেইজনে সোমবাৰে টকা দিবলৈ যাওতেই পানীতোলা আৰক্ষী চকীৰ ভাৰপ্ৰাপ্ত আৰক্ষী বিষয়া দীনকান্ত সোনোৱালে হাতে-লোটে আটক কৰে সচিব গৰাকীক ৷ ইফালে, আৰক্ষীয়ে আটক কৰা সচিব গৰাকীয়ে উল্লেখ কৰে যে, টকাখিনি কাৰ্যালয়ৰ কামত ব্যৱহাৰৰ বাবে কাগজ কিনিবলৈহে বিচাৰিছিল ৷
সম্প্ৰতি এই ঘটনাই অঞ্চলটোত তীব্ৰ চাঞ্চল্য সৃষ্টি কৰিছে ৷ ইপিনে সমগ্ৰ ঘটনাটোৰ সৰ্ন্দভত মটক যুৱ-ছাত্ৰ পৰিষদৰ সাধাৰণ সম্পাদক উজ্জ্বল বৰুৱাই প্ৰতিক্ৰিয়া প্ৰকাশ কৰি কয় যে, আৰক্ষী-প্ৰশানে সমগ্ৰ ঘটনাৰ তদন্ত কৰি দোষীত উচিত শাস্তি প্ৰদান কৰিব লাগে ৷
এইদৰে বৰ্তমানেও চৰকাৰৰ দুৰ্নীতি বিৰোধী নীতিক বুঢ়া আঙুলি দেখুৱাই পঞ্চায়ত পৰ্যায়ৰ পৰা চৰকাৰী উচ্চ পৰ্যায়লৈ বিভিন্ন ক্ষেত্ৰত দুৰ্নীতি সংঘটিত কৰি আহিছে একাংশ অৰ্থলোভী কৰ্মচাৰীয়ে ৷ একাংশক ৰঙা ঘৰলৈ যোৱা দেখিও যেন গাৰ পৰা দুৰ্নীতি বোকা আঁতৰাবলৈ অনিচ্ছুক এনে একাংশ বিষয়া ৷
উল্লেখযোগ্য যে, দুৰ্নীতিৰ বিৰুদ্ধে সৰৱ হৈ পৰিছে ৰাজহ আৰু দুৰ্যোগ প্ৰশমন বিভাগৰ ৰাজ্যিক মন্ত্ৰী যোগেন মহন । দুৰ্নীতিগ্ৰস্ত বিষয়াক নাকী লগাবলৈ সাজু মন্ত্ৰী গৰাকী । দুৰ্নীতিক সমূলঞ্চে নোহোৱা কৰাৰ বাবে কঠোৰ স্থিতি গ্ৰহণ কৰিছে মন্ত্ৰীগৰাকীয়ে ।
তেওঁৰ বিভাগত হোৱা যিকোনো দুৰ্নীতিৰ বিষয়ে এতিয়াৰে পৰা ৰাইজে পোনপটীয়াকৈ মন্ত্ৰীগৰাকীক জনাব পাৰিব । ৰাইজৰ সুবিধাৰ্থে তেওঁ এটা হোৱাটছ এপ নম্বৰ মুকলি কৰিছে । তেওঁৰ নিজা ফেচবুক পেজত হোৱাটছ এপ নম্বৰ মুকলি কৰাৰ কথা ঘোষণা কৰিছে ।
লগতে পঢ়কঃ দুৰ্নীতিৰ অভিযোগ লাভৰ পাছতে বিভাগীয় তদন্তৰ ঘোষণা মন্ত্ৰী যোগেন মহনৰ
