মাৰ্ঘেৰিটা, 2 জুলাই : মাৰ্ঘেৰিটাৰ দিহিং চাহ বাগিচাৰ সমীপত বৃহস্পতিবাৰে সন্ধ্যা ৭.৩০ বজাত এক শোকাবহ পথ দুৰ্ঘটনা সংঘটিত হয় । এই দুৰ্ঘটনাত এজন লোক নিহত হোৱাৰ লগতে আন ৩ জন লোক আঘাতপ্ৰাপ্ত । মাৰ্ঘেৰিটাৰ পৰা ডিগবৈ অভিমুখে 315 নং ৰাষ্ট্ৰীয় ঘাইপথেদি তীব্ৰবেগত গৈ থকা এ এছ ০৬ চি ৮৩২৩ নম্বৰৰ মাৰুটি জেন গাড়ীখনে প্ৰথমে মাৰ্ঘেৰিটা থাৰ্মেল তিনি আলিৰ কাষত এজন পথচাৰীক খুন্দা মাৰে ৷ তাৰ পাচত মাকুম পথাৰ আৰ্মীকেম্পৰ কাষত দ্বিতীয়টো দুৰ্ঘটনা সংঘটিত কৰি তীব্ৰ বেগত আগবাঢ়ি গৈ দিহিং চাহ বাগিচাৰ কাষত তৃতীয়টো দুৰ্ঘটনা সংঘটিত কৰে ৷ এই দুৰ্ঘটনাত সঞ্জিত দাস নামৰ এজন লোকক প্ৰচণ্ড জোৰেৰে মহটিয়াই নিয়াত ব্যক্তিজন থিতাতে নিহত হয় ।
এই দুৰ্ঘটনা সংঘটিত কৰিয়েই চালকজন পলায়ন কৰে যদিও চালকৰ লগত বহি যোৱা এজন লোক কম-বেছি পৰিমাণে আঘাতপ্ৰাপ্ত হোৱাত ৰাইজে চিকিৎসালয়লৈ প্ৰেৰণ কৰিছে।
লগতে পঢ়ক : চিকিৎসক আৰু নাৰ্ছৰ বাবে বছৰৰ শেষলৈ 25 শতাংশ ৰেহাইৰ সুবিধা ইণ্ডিগ'ৰ
