তিনিচুকীয়া,৯ আগষ্ট : তিনিচুকীয়াৰ সাংবাদিক হত্যাৰ ঘটনাত জড়িত মূল অভিযুক্তক আটক তিনিচুকীয়া আৰক্ষীৰ ৷ তিনিচুকীয়া ফিল’বাৰী পুৰণা বজাৰৰ যুৱতী আছলতী বাগ নামৰ এগৰাকী মহিলাই হত্যা কৰিছিল সাংবাদিক বিজন দ্বীপ তাঁতীক ৷ তিনিচুকীয়াৰ অতিৰিক্ত আৰক্ষী অধীক্ষক ৰিপুঞ্জয় কাকতিৰ নেতৃত্বত চলা তাৎক্ষণিক তদন্তই সাংবাদিক বিজন দ্বীপ তাঁতীক হত্যা কৰা মূল অভিযুক্তগৰাকীক আটক কৰিবলৈ সক্ষম হয় ৷
শনিবাৰে ন-পুখুৰীৰ কাৰ্যালয়ত সাংবাদিক গৰাকীৰ মৃতদেহ উদ্ধাৰৰ পাচতেই আৰক্ষীয়ে বিশেষ শুংসূত্ৰ লাভ কৰি সন্ধিয়াই ফিল’বাৰীৰ পৰা আছলতী বাগ আৰু ভগ্নি নিতু বাগক আটক কৰি মাৰথান জেৰা চলায় ৷ আৰক্ষীৰ জেৰাত হত্যাকাণ্ডৰ সমগ্ৰ ঘটনা অভিযুক্ত আছলতী বাগে আৰক্ষীৰ আগত স্বীকাৰ কৰে ৷
৬ আগষ্টত সাংবাদিক গৰাকীৰ কাৰ্যালয়লৈ আহি নিশা ১১ বজাত এডাল কেবলেৰে ডিঙিত মেৰিয়াই বিজন দ্বীপক তাঁতীক হত্যা কৰি গোটেই নিশা মৃতদেহৰ লগতে আছিল আছলতী বাগ ৷ হত্যাকাণ্ড সংঘটিত কৰি ৭ আগষ্টৰ পুৱাই কাৰ্যালয়ৰ পৰা ফিল’বাৰীলৈ গুছি গৈছিল যুৱতী গৰাকী ৷
ইতিমধ্যে জেৰাৰ অন্তত আছলতী বাগক পাঁচ দিনৰ বাবে আৰক্ষীয়ে ন্যায়িক জিম্মাত লৈ ভগ্নি নিতু বাগক যাবলৈ দিছে ৷ আছলতী বাগে কিয় বিজন দ্বীপক হত্যা কৰিলে সেয়া তদন্তৰ ক্ষাতিৰত সাংবাদিকক জনোৱাৰ পৰা বিৰত থাকে আৰক্ষী ৷
ইপিনে হত্যাকাণ্ডৰ সমগ্ৰ ঘটনা শেষ হোৱা দিশে গতি কৰা বুলি দেওবাৰে তিনিচুকীয়া সদৰ থানাত এক সংবাদমেল সম্বোধন কৰি স্পষ্ট কৰে অতিৰিক্ত আৰক্ষী অধীক্ষক ৰিপুঞ্জয় কাকতিয়ে ৷ আনহাতে তিনিচুকীয়া আৰক্ষীয়ে তাৎক্ষণিক তদন্তই মূল অপৰাধীক আটক কৰা ঘটনাক সকলোৱে শলাগ লৈছে ৷
লগতে পঢ়ক : ভুল চিকিৎসাৰ বাবেই মৃত্যু হৈছিল আৰক্ষী কনিষ্টবল লক্ষেশ্বৰ হাজৰিকাৰ ! পুত্ৰৰ বিস্ফোৰক অভিযোগ
