তিনিচুকীয়াত অগ্নিকাণ্ডত জাহ গ'ল তিনিটাকৈ অধিক গুদাম

তিনিচুকীয়াত ভয়ংকৰ অগ্নিকাণ্ড ৷ জুইত জাহ গ'ল তিনিটাতকৈও অধিক গুদাম ৷ তিনিচুকীয়া চহৰৰ দাঁতিকাষৰীয়া বালুগাডা অঞ্চলত অগ্নিকাণ্ডৰ সূত্ৰপাত ৷ প্ৰথমে বিটুমিনৰ এটা গুদামত অগ্নিকাণ্ডৰ সূত্ৰপাত হয় ৷ গুদামটোত অবৈধভাৱে টাৰ্পলিন আৰু ইলাচি মজুত ৰখাৰ সন্দেহ ৷

তিনিচুকীয়া, 7 ফেব্ৰুৱাৰী: দেওবাৰে পুৱাৰ ভাগতে তিনিচুকীয়া চহৰৰ দাঁতিকাষৰীয়া বালুগাডা অঞ্চলত সংঘটিত এক ভয়ংকৰ অগ্নিকাণ্ডত তিনিটাতকৈও অধিক গুদাম জুইত জাহ যায় ৷ জানিব পৰা মতে, দেওবাৰে পুৱা পৱন চামৰিয়াৰ নামৰ এজন ব্যক্তিৰ গুদামত অগ্নিকাণ্ডৰ সূত্ৰপাত হয় ৷ প্ৰথমে বিটুমিনৰ এটা গুদামত জুইৰ সূত্ৰপাত ঘটাৰ পাছতে কাষতে থকা অন্য গুদাম সমূহলৈও জুই বিয়পি পৰে ৷

প্ৰথমে বিটুমিনৰ এটা গুদামত অগ্নিকাণ্ডৰ সূত্ৰপাত হয়

উল্লেখ্য যে, অগ্নিৰ সূত্ৰপাত হোৱা গুদামটো পৱন চামৰিয়া নামৰ এজন ব্যক্তিৰ বুলি জানিব পৰা গৈছে ৷ স্থানীয় ৰাইজে চামৰিয়াৰ গুদামটোত অবৈধভাৱে টাৰ্পলিন আৰু ইলাচি মজুত ৰখাৰ সন্দেহ প্ৰকাশ কৰিছে ৷ জুইয়ে পলকতে গুদামসমূহ আগুৰি পেলোৱাৰ পাছৰ পৰ্যায়ত অগ্নি নিৰ্বাপক বাহিনীৰ প্ৰায় পাঁচ খনকৈ বাহনে অৱশেষত জুই নিৰ্বাপন কৰিবলৈ সক্ষম হয় বুলি জানিব পৰা গৈছে ৷

মন কৰিব লগীয়া যে, বিগত সময়চোৱাত স্থানীয় ৰাইজে গুদামটোৰ পৰা উলোৱা দুৰ্গন্ধৰ বাবে কেইবাবাৰো অভিযোগ উত্থাপন কৰি অবৈধভাৱে চলোৱা গুদামটো বন্ধ কৰাৰ দাবী জনাই আহিছে ৷ এই বিষয় সন্দৰ্ভত প্ৰশাসনিক বিষয়াকো অৱগত কৰি অহাৰ পাছতো কোনো ব্যৱস্থা গ্ৰহণ নকৰাৰ ফলত স্থানীয় ৰাইজ এতিয়া ক্ষুব্ধ হৈ পৰা পৰিলক্ষিত হৈছে ৷

দেওবাৰে সংঘটিত অগ্নিকাণ্ডৰ কাৰণ এতিয়াও সঠিককৈ জানিব পৰা হোৱা নাই ৷

লগতে পঢ়ক:কলগাছিয়াৰ বালাগাঁৱত ভয়ংকৰ অগ্নিকাণ্ড