তিনিচুকীয়াত গীতাঞ্জলিয়ে আনিলে আনন্দৰ বন্যা

সদ্য ঘোষিত হাইস্কুল শিক্ষান্ত পৰীক্ষাৰ ফলাফলত তিনিচুকীয়াৰ এখন অনাথ আশ্ৰমৰ আবাসী গীতাঞ্জলি তাছাই কঢ়িয়াই আনিছে আনন্দৰ বন্যা ৷ তিনিটা বিষয়ত লেটাৰ মাৰ্কসহ মুঠ 430 নম্বৰেৰে প্ৰথম বিভাগত সুখ্যাতিৰে উত্তীৰ্ণ হৈছে গীতাঞ্জলি ৷

তিনিচুকীয়া, 6 জুনঃ শনিবাৰে ঘোষিত হাইস্কুল শিক্ষান্ত পৰীক্ষাৰ ফলাফলে আনন্দৰ বন্যা কঢ়িয়াই আনিছে তিনিচুকীয়াৰ এখন অনাথ আশ্ৰমলৈ ৷ সদ্য ঘোষিত হাইস্কুল শিক্ষান্ত পৰীক্ষাৰ ফলাফলত, তিনিটা বিষয়ত লেটাৰ মাৰ্কসহ মুঠ 430 নম্বৰেৰে প্ৰথম বিভাগত সুখ্যাতিৰে উত্তীৰ্ণ হৈ গীতাঞ্জলিয়ে অনাথালয় খনৰ লগতে গৌৰৱ কঢ়িয়াই আনিছে সমগ্ৰ অঞ্চলটোলৈ ৷

পানীতোলা কস্তুৰবা গান্ধী বালিকা বিদ্যালয়ৰ ছাত্ৰী গীতাঞ্জলি,বৰহাপজানৰ কেশৱ বাহেতি সূৰ্যোদয় শিশু গৃহ নামৰ আশ্ৰম খনতে সৰুৰে পৰা ডাঙৰ হোৱা এই ছাত্ৰীগৰাকীৰ সফলতাত আনন্দিত আশ্ৰমখনৰ আবাসীসকল ৷ কিন্তু সকলো থাকিও যেন,কিবা এটা নাই গীতাঞ্জলিৰ ৷ এই আনন্দৰ মূহুৰ্তৰ অংশীদাৰ হ'বলৈ কাষত নাই তাইৰ পিতৃ মাতৃ ৷

গীতাঞ্জলিয়ে আশ্ৰম খনৰ কৰ্মচাৰীসকলে দিয়া সামান্য সুবিধাৰ মাজেৰেই আজি কঠিন পৰীক্ষাত উত্তীৰ্ণ হৈ জীৱন যুদ্ধত জয়ী যোৱাৰ বাট মুকলি কৰিছে ৷ ইয়াকে লৈ উৎফুল্লিত হৈ পৰিছে অনাথালয় খনৰ সকলো সদস্য ৷ উল্লেখ্য যে,গীতাঞ্জলিৰ খবৰ লাভ কৰি তাইৰ ভৱিষ্যত অধ্যয়নৰ বাবে সহায় কৰিবলৈ আগবাঢ়ি আহিছে তিনিচুকীয়াৰ যুৱ উদ্যোগী ৰাজৰ্ষি গগৈ ৷

কঠোৰ অধ্য়ৱসায় আৰু দৃঢ়তাৰে গীতাঞ্জলি তাছাই জীৱনৰ কঠোৰতম সময়খিনিক আনন্দৰ মূহুৰ্তলৈ পৰিৱৰ্তন কৰাৰ এই সময়খিনিৰ অংশীদাৰ হৈ পৰিল সকলো ৷ ইটিভি ভাৰতৰ তৰফৰ পৰাও গীতাঞ্জলিলৈ জনালো শুভেচ্ছা ৷

লগতে পঢ়কঃ হাইমাদ্ৰাছাত প্ৰথম স্থানত উজ্বলিল পাচলি বিক্ৰী কৰা পিতৃৰ সন্তান