তিনিচুকীয়া,18 মে’: তিনিচুকীয়া জিলাত দিনকদিনে বৃদ্ধি হৈছে ড্ৰাগছৰ অবাধ প্ৰচলন ৷ ৰাজ্যত কৰ’ণা আতংকৰ মাজতে তিনিচুকীয়াৰ মাকুম অঞ্চলৰ অন্তৰ্গত ৰূপনগৰত ড্ৰাগছসহ দুজন যুৱকক আটক । আটক যুৱক দুজন বৰগুৰিৰ বুলি জানিব পৰা গৈছে । সোমবাৰে মাকুমৰ ৰূপনগৰবাসীৰ তৎপৰতাত চিৰঞ্জীৱ গোঁহাই নামৰ এজন ব্যক্তিৰ ঘৰত অভিযান চলাই হাতে-লোটে ড্ৰাগছ সেৱন কৰি থকা অৱস্থাত দুজন যুৱকক কৰায়ত্ত কৰে ৰাইজে ৷
বৰ্তমান ড্ৰাগছ ব্যৱসায়ী চিৰঞ্জীৱ গোঁহাই পলাতক অৱস্থাত আছে । স্থানীয় ৰাইজে আটকাধীন যুৱক কেইজনৰ পৰা বহু পৰিমাণৰ ড্ৰাগছ আৰু ড্ৰাগছ সেৱন কৰাৰ সময়ত ব্যৱহাৰ কৰা সা-সঁজুলি উদ্ধাৰ কৰি মাকুম আৰক্ষীক গতাই দিয়ে ।
