ডুমডুমা, 13 নৱেম্বৰ: অসমত বসবাস কৰা গোৰ্খা জনগোষ্ঠীৰ লোকসকলে পালন কৰি অহা উৎসৱসমূহৰ অন্যতম হ'ল তিহাৰ উৎসৱ । তিহাৰৰ লগতে দেউচী উৰুৱা উৎসৱো পালন কৰা হয় । কাতি মাহৰ শুক্লা প্ৰতিপদৰ পৰা পূৰ্ণিমালৈকে গোৰ্খাসকলে এই উৎসৱ পালন কৰে ৷
তিহাৰত গাঁৱৰ ডেকা-গাভৰু লগ হৈ ঘৰে-ঘৰে গৈ দেউচী-ভৈলী পৰিৱেশন কৰে ৷ উক্তদিনটোত গাঁৱৰ ডেকা-বুঢ়া, যুৱক-যুৱতী লগ হৈ দেউচী উৰুৱা উৎসৱ পালন কৰে । অসমৰ অন্যতম গোৰ্খা জনবহুল ঠাই তিনিচুকীয়াৰ ফিল'বাৰীতো দেউচী উৰুৱা উৎসৱ উলহ-মালহেৰে পালন কৰা পৰিলক্ষিত হ'ল ।
ফিল'বাৰীৰ ৰংপুৰ ৰাজহুৱা খেলপথাৰত ভানুভক্ত যুৱক সংঘ আৰু ভানুপ্ৰিয়া মহিলা সমিতিৰ যৌথ উদ্যোগত অনুষ্ঠিত কৰা এই উৎসৱত জনগোষ্ঠীটোৰ দেউচী-ভৈলী, সংগীনি নৃত্য প্ৰদৰ্শন কৰা হয় ৷ লগতে চেল ৰুটি বা মালা ৰুটিৰে উপস্থিত সকলোকে আপ্যায়ন কৰা হয় । আগন্তুক বৰ্ষৰ বাবে গোৰ্খাসকলে দেউচী উৰুৱা উৎসৱৰ জৰিয়তে তিহাৰক বিদায় দিয়ে ।
লগতে পঢ়ক : ধৰ্মগ্ৰন্থৰ নামতো বেপাৰ চলে অসমত
