তিনিচুকীয়া,9 ফেব্ৰুৱাৰী: মঙলবাৰে তিনিচুকীয়াত ভাৰতীয় জনতা পাৰ্টীৰ বিধানসভা সমষ্টি কেন্দ্ৰিক পৃষ্ঠা প্ৰমুখ সন্মিলন অনুষ্ঠিত হয় ৷ এই সন্মিলনত অংশগ্ৰহণ কৰে ৰাজ্যৰ মুখ্যমন্ত্ৰী সৰ্বানন্দ সোণোৱালে ৷ তিনিচুকীয়া জিলাৰ বিমলা প্ৰসাদ চলিহা নগৰ খেলপথাৰত অনুষ্ঠিত এই পৃষ্ঠা প্ৰমুখ সন্মিলনতে মুখ্যমন্ত্ৰী সৰ্বানন্দ সোণোৱালে উপস্থিত হৈ 7 টাকৈ পথৰ আধাৰশিলা উদ্বোধন কৰে ৷ তদুপৰি সন্মিলনত কেন্দ্ৰীয় পৃষ্ঠা প্ৰমুখসকলক নিযুক্তি প্ৰদান কৰা হয় ৷
ইপিনে সংবাদ মাধ্যমৰ আগত মুখ্যমন্ত্ৰীগৰাকীয়ে কংগ্ৰেছক ক্ষুৰধাৰ সমালোচনা কৰে ৷ বিগত 15 টা বছৰে কংগ্ৰেছে অসমৰ বাবে একো কাম নকৰিলে বুলি মুখ্যমন্ত্ৰী সোণোৱালে মন্তব্য কৰি বিজেপি মিত্ৰজোঁটে 5 বছৰতে ৰাজ্যৰ উন্নয়নৰ বাবে যথেষ্ট কাম কৰা বুলি মন্তব্য কৰে ৷ তদুপৰি 2021ৰ বিধানসভা নিৰ্বাচনত বিজেপি মিত্ৰজোঁট দলে পুনৰ শাসনৰ গাদীত বহাৰ দাবী কৰি কংগ্ৰেছৰ নাটক পুৰণি হ'ল বুলি কৈ মহাজোঁট বন্ধনে বিজেপিৰ একো ক্ষতি কৰিব নোৱাৰে বুলি কয় মুখ্যমন্ত্ৰীগৰাকীয়ে ৷ ইয়াৰ লগতে কংগ্ৰেছক অসমৰ ৰাইজে প্ৰত্যাখ্যান কৰা বুলিও কটাক্ষ কৰে মুখ্যমন্ত্ৰী সোণোৱালে ৷
আনহাতে, এই সন্মিলনত কেন্দ্ৰীয় খাদ্য সংশোধন মন্ত্ৰী ৰামেশ্বৰ তেলী, ৰাজ্যৰ শ্ৰম মন্ত্ৰী তথা তিনিচুকীয়াৰ স্থানীয় বিধায়ক সঞ্জয় কিষাণ, ডিগবৈ সমষ্টিৰ বিধায়ক সুৰেণ ফুকন, ন-বিজেপি অৰুণজ্যোতি মৰাণকে ধৰি বহুকেইগৰাকী মন্ত্ৰী, বিধায়ক উপস্থিত থাকে ৷
লগতে পঢ়কঃ তিনিটা দশকৰ পিছতো ৰূপায়িত নহ'ল অসম চুক্তিৰ 6 নং দফা
