তিনিচুকীয়া, 25 নৱেম্বৰঃ তিনিচুকীয়া জিলাৰ মাৰ্ঘেৰিটা বিধানসভা সমষ্টিৰ অন্তৰ্গত মাৰ্ঘেৰিটা জিলা ক্ৰীড়া সন্থাৰ তত্ত্বাৱধানত বুঢ়ীদিহিং স্পৰ্টছ ক্লাৱৰ উদ্যোগত আৰু তিনিচুকীয়া জিলা আৰক্ষী,বালিজান নৱ জাগৃত যুৱক সংঘ তথা বুঢ়ীদিহিংবাসী ৰাইজৰ সহযোগত অনুষ্ঠিত কৰা হৈছে ‘বুঢ়ীদিহিং কাপ ফুটবল’ প্ৰতিযোগিতা ৷ সোমবাৰৰ পৰা বালিজান ৰাজহুৱা খেলপথাৰত শ্বহীদ ভাস্কৰ কলিতা সোঁৱৰণী প্ৰাইজমানি ফুটবল প্ৰতিযোগিতা "বুঢ়ীদিহিং কাপ ফুটবল" প্ৰতিযোগিতাখনি আৰম্ভ কৰা হয় ।
প্ৰতিযোগিতাখনৰ পতাকা উত্তোলন বুঢ়ীদিহিং স্পৰ্টছ ক্লাৱৰ কাৰ্যকৰী সভাপতি বিজু মেধিয়ে কৰাৰ বিপৰীতে স্মৃতি তৰ্পন কৰে বুঢ়ীদিহিং স্পৰ্টছ ক্লাৱৰ সম্পাদক ৰমেন সোণোৱাল আৰু পৰিচালন সম্পাদক ৰাজপল্লৱ মৰাণে ৷ আনহাতে শ্বহীদ ভাস্কৰ কলিতাৰ প্ৰতিচ্ছবিত মাল্যাৰ্পণ কৰে বৰডুমচা আৰক্ষী থানাৰ ভাৰপ্ৰাপ্ত বিষয়া শ্ৰীযুত লাৰ্নিচ পেগুৱে ৷
আৰম্ভণি খেলখনত মুখামুখি হয় ডিমৰুহোলা ফুটবল দল বনাম নাজিৰাটিং ফুটবল দল। শুভাৰম্ভণি অনুষ্ঠানত মুখ্য অতিথি হিচাপে উপস্থিত থাকে মাৰ্ঘেৰিটা জিলা ক্ৰীড়া সন্থাৰ সভাপতি তথা বিধায়ক ভাস্কৰ শৰ্মা ৷ সৰ্বমুঠ ১২ টাকৈ দলে অংশগ্ৰহণ কৰিবলগীয়া প্ৰতিযোগিতাখন ডিচেম্বৰ মাহৰ 8 তাৰিখে সামৰণি পৰিব ।
