ডুমডুমা, 20 ডিচেম্বৰ: অৰুণাচলত পুনৰ সন্ধানহীন অসমৰ যুৱক ৷ পেটৰ তাড়নাত অৰুণাচললৈ কাম বিচাৰি যোৱা অসমৰ এজন যুৱক সন্ধানহীন হোৱাৰ ঘটনা সংঘটিত হৈছে ৷ শদিয়া চুনপুৰা নৌপটীয়া নিবাসী কুবিৰ লিম্বুৰ ২৪ বছৰীয়া পুত্ৰ বিকাশ লিম্বু বিগত ২৯ নৱেম্বৰৰ পৰা অৰুণাচলত সন্ধানহীন হৈ আছে ৷ অৰুণাচল প্ৰদেশৰ আলুবাৰীত এটা শিলৰ কাৰখানাত কৰ্মৰত আছিল বিকাশ লিম্বু ৷ বিকাশ লিম্বুক প্ৰায়ে 15 ৰ পৰা 20 জনীয়া এটা দুৰ্বৃত্ত্বৰ দলে আক্ৰমণ কৰি হত্যাৰ চেষ্টা চলোৱাৰ গুৰুতৰ অভিযোগ উত্থাপন কৰিছে বিকাশৰ পৰিয়ালৰ লোকে ৷
ইফালে, বিকাশ লিম্বুৰ সন্ধানহীনৰ ঘটনা সম্পৰ্কে সদৌ অসম গোৰ্খা ছাত্ৰ সন্থাই তিনিচুকীয়া জিলা প্ৰসাশনৰ লগতে অৰুণাচল প্ৰসাশনৰ সৈতে কেইবাবাৰো বিষয়টোৰ সম্পৰ্কে অৱগত কৰোৱাৰ পাছতো কোনোধৰণৰ ব্যৱস্থা গ্ৰহণ নকৰাৰ অভিযোগ উত্থাপিত হৈছে ৷ শনিবাৰে গোৰ্খা ছাত্ৰ সন্থাৰ এটা দলে বিকাশ লিম্বুৰ বাসগৃহত উপস্থিত হৈ এখন ৰাজহুৱা সভা অনুষ্ঠিত কৰে ৷ সংগঠনটোৰ বিষয়ববীয়াসকলে শীঘ্ৰেই বিকাশ লিম্বুক উদ্ধাৰ কৰিবলৈ চৰকাৰ-প্ৰসাশনক দাবী জনোৱাৰ লগতে তিনিচুকীয়া জিলাৰে অৰুণাচলত প্ৰৱেশ কৰা পথসমূহ অৱৰোধ কৰাৰ হুংকাৰ প্ৰদান কৰে ৷
লগতে পঢ়ক: আইচিইউ কক্ষত সংঘটিত অগ্নিকাণ্ডত মৃত্যুক সাৱটিলে 9 গৰাকী ক'ভিড-19 আক্ৰান্তই
