তিনিচুকীয়া, ৭ জানুৱাৰী: 'কা' বিৰোধী আন্দোলনত মৰাণ জনগোষ্ঠীক নেতৃত্ব দিয়া সদৌ মৰাণ ছাত্ৰ সন্থাৰ প্ৰাক্তন সভাপতি অৰুণজ্যোতি মৰাণে ভাৰতীয় জনতা পাৰ্টীৰ সদস্যপদ গ্ৰহণ কৰিলে । ১৯৯৭ চনত তেওঁ সদৌ মৰাণ ছাত্ৰ সন্থাৰ সৈতে আনুষ্ঠানিকভাৱে জড়িত হৈছিল । ইয়াৰ পিছতে তিনিচুকীয়া আঞ্চলিক সমিতিৰ সমাজ সেৱা সম্পাদক হিচাপে দায়িত্ব পালন কৰে । ২০০১ চনৰ পৰা ২০২০ চনলৈ ক্ৰমান্বয়ে কাৰ্যনিবাহক সদস্য,সহকাৰী সাধাৰণ সম্পাদক, সাংগঠনিক সম্পাদক, সাধাৰণ সম্পাদক,উপদেষ্টা আৰু সভাপতিৰ দায়িত্বভাৰ গ্ৰহণ কৰে নকুল চুতীয়া আৰু ইনভা চুতীয়াৰ পুত্ৰ অৰুণজ্যোতিয়ে ।
তেওঁ ১৯৯৮ চনৰ পৰা ২০০১ চনলৈ ক্ৰমে পুৰণি মতাপুং কৰ্মবীৰ সংঘৰ শিক্ষা আৰু সাংস্কৃতিক সম্পাদক,সাধাৰণ সম্পাদক আৰু উপদেষ্টা হিচাপে সেৱা আগবঢ়ায় । ১৯৯৮ চনৰ পৰা ২০০৫ চনলৈ বাৰেকুৰি আঞ্চলিক যুৱ সংঘৰ আলোচনী সম্পাদক,সাধাৰণ সম্পাদক আৰু সভাপতিৰ দায়িত্বত থাকে । বাৰেকুৰি কাপ ফুটবল প্ৰতিযোগিতা আৰু বদৌচা কাপ ফুটবল প্ৰতিযোগিতাৰ প্ৰতিষ্ঠাপক অৰুণজ্যোতি মৰাণ ।
বদৌচা স্পৰ্টছ ক্লাৱৰো সভাপতি আছিল ন-বিজেপি অৰুণজ্যোতি মৰাণ । তেওঁ জনগোষ্ঠীয় ঐক্য মঞ্চৰ আহ্বায়ক আৰু জনগোষ্ঠীয় সমন্বয়ৰক্ষী সমিতিৰ সমন্বয়ক হিচাপেও দায়িত্ব পালন কৰিছে । ৭৩ সংখ্যাক অসম সাহিত্য সভাৰ বুঢ়ীদিহিং-বৰডুমচা অধিৱেশনৰ অভ্যৰ্থনা সমিতিৰ সাধাৰণ সম্পাদক আছিল । ২০১৮ চনত অসম সাহিত্য সভাৰ জনগোষ্ঠীয় যুৱ ছাত্ৰ সংগঠন সমূহৰ সমন্বয়ৰক্ষী কোষৰ আহ্বায়কৰ দায়িত্বত আছিল অৰুণজ্যোতি মৰাণ ।
২০১৯ চনৰ পৰা বৰ্তমানলৈকে অসম অলিম্পিক সন্থাৰ সহকাৰী সম্পাদক হিচাপে কাম কৰি আছে । অসম হেণ্ডবল সন্থাৰ উপ-সভাপতি আৰু জ্যেষ্ঠ উপ-সভাপতিৰ দায়িত্বতো আছিল অৰুণজ্যোতি মৰাণ । তিনিচুকীয়া জিলা ক্ৰীড়া সন্থা, সদৌ অসম নবীন লেখক-লেখিকা সমাৰোহৰ সদস্য হোৱাৰ লগতে বাৰেকুৰি মহাবিদ্যালয় আৰু বাৰেকুৰি শাখা সাহিত্য সভা প্ৰতিষ্ঠাৰ ক্ষেত্ৰত অৰুণজ্যোতি মৰাণে অগ্ৰণী ভূমিকা গ্ৰহণ কৰিছিল । তিনিচুকীয়াৰ পুৰণি মতাপুং গাঁৱত জন্মগ্ৰহণ কৰা অৰুণজ্যোতি মৰাণ বৰ্তমান ডিগবৈৰ বাসিন্দা ।
লগতে পঢ়ক:ডিব্ৰুগড়ত কৃষি আইনৰ বিৰুদ্ধে একাধিক সংগঠনৰ পথ অৱৰোধ
