তিনিচুকীয়া, 10 ফেব্ৰুৱাৰী: শুকুৰবাৰে সদৌ অসম ছাত্ৰ সন্থাৰ সাধাৰণ সম্পাদক শংকৰজ্যোতি বৰুৱাই সদৌ তিনিচুকীয়া জিলা ছাত্ৰ সন্থাৰ সাধাৰণ সম্পাদক সমৰজ্যোতি গোঁহাইৰ উপস্থিতিত গুইজান বজাৰত তিনিচুকীয়া আঞ্চলিক ছাত্ৰ সন্থাৰ অন্তৰ্গত গুইজান শাখা ছাত্ৰ সন্থাৰ এটি নৱনিৰ্মিত কাৰ্যালয় তথা শ্বহীদ ভৱনৰ শুভ উদ্বোধন কৰে (AASU Swahid Bhawan inaugurated) ৷
উক্ত অনুষ্ঠানলৈ সদৌ অসম ছাত্ৰ সন্থাৰ সাধাৰণ সম্পাদক শংকৰজ্যোতি বৰুৱাক বিহু, ঝুমুৰ, মিচিং বিহুকে আদিৰে বৃহৎ সংখ্যক স্থানীয় ৰাইজৰ সৈতে আছুৰ কৰ্মকৰ্তাসকলে উষ্ম আদৰণি জনায় (AASU general secretary Sankarjyoti Baruah) ৷ পৰৱৰ্তী সময়ত গুইজান শাখা ছাত্ৰ সন্থাৰ উপদেষ্টা তথা সদৌ তিনিচুকীয়া জিলা ছাত্ৰ সন্থাৰ সহকাৰী সাধাৰণ সম্পাদক সত্য বৰগোহাঁয়ে আঁত ধৰা অনুষ্ঠানটোত শ্বহীদ খৰ্গেশ্বৰ তালুকদাৰৰ প্ৰতিচ্ছবিত বন্তি প্ৰজ্জ্বলন কৰি পুষ্পাঞ্জলিৰে শ্বহীদগৰাকীক আছুৰ সাধাৰণ সম্পাদক শংকৰজ্যোতি বৰুৱাই ৷ ইয়াৰ লগতে ফিটা কাটি শ্বহীদ ভৱনটো শুভ উদ্বোধন কৰে ৷ আছুৰ সাধাৰণ সম্পাদক বৰুৱাই ভৱনটো ফিটা কাটি উদ্বোধন কৰাৰ পাচতে উপস্থিত আইসকলে উৰুলিৰে এক মাংগলিক পৰিবেশৰ সৃষ্টি কৰে ৷
উক্ত অনুষ্ঠানত সদৌ অসম ছাত্ৰ সন্থাৰ সাধাৰণ সম্পাদক শংকৰজ্যোতি বৰুৱাৰ সৈতে জিলা আছুৰ সাধাৰণ সম্পাদক সমৰজ্যোতি গোঁহাই, শিক্ষক সুশীল বৰুৱাকে আদি কৰি গুইজানৰ কেইবাগৰাকীও শিক্ষকৰ লগতে গণ্যমান্য ব্যক্তি উপস্থিত থাকে ৷ ইয়াৰ লগতে জিলা, আঞ্চলিক আৰু শাখা পৰ্যায়ৰ আছুৰ কৰ্মকৰ্তাসকলো উপস্থিত থাকে (AASU Swahid Bhawan inaugurated at Guijan) ৷
শ্বহীদ ভৱনটো উদ্বোধন কৰাৰ পাচতে এখন উদ্বোধনী সভাও আয়োজন কৰা হয় ৷ সভাখন স্থানীয় আইসকলৰ এটি দিহা নামেৰে আৰম্ভ হয় ৷ পৰৱৰ্তী সময়ত আছুৰ সাধাৰণ সম্পাদক শংকৰজ্যোতি বৰুৱাক গুইজান শাখা ছাত্ৰ সন্থাৰ তৰফৰ পৰা এখন ফুলাম গামোছা, এখন চেলেং, এখন শৰাইৰ লগতে এখন সম্বৰ্ধনা পত্ৰৰে সম্বৰ্ধনা জ্ঞাপন কৰা হয় ৷
কেইবাগৰাকীও স্থানীয় গণ্য মান্য ব্যক্তি তথা ৰাইজৰ উপস্থিতিৰ সাধাৰণ সম্পাদক শংকৰজ্যোতি বৰুৱাই কয় যে, গুইজান শাখা ছাত্ৰ সন্থা সদৌ অসম ছাত্ৰ সন্থাৰ মানচিত্ৰত এখন শক্তিশালী শাখা ছাত্ৰ সন্থা ৷ গুইজান শাখা ছাত্ৰ সন্থাই গুইজানৰ বিভিন্ন সমস্যাত ৰাইজৰ সৈতে মাত মাতি আহিছে ৷ এতিয়াৰ পৰা এইখন চালিৰ তলতে সকলো একত্ৰিত হৈ পৰিকল্পনা প্ৰস্তুত কৰিব ৷
তেওঁ লগতে কয় যে, এয়া কেৱল সদৌ অসম ছাত্ৰ সন্থাৰ কাৰ্যালয় নহয়, এয়া গুইজানৰ প্ৰতিগৰাকী সমাজ সচেতন ব্যক্তি, সমাজৰ সকে কাম কৰিব বিচৰা লোকৰ কাৰ্যালয় । গুইজানৰ গৰাখহনীয়াৰ সমস্যা, শৈক্ষিক সমস্যাকে আদি কৰি সকলো সমস্যাৰ ক্ষেত্ৰত গুইজান শাখা ছাত্ৰ সন্থাই এই কাৰ্যালয়ত একত্ৰিত হৈ মাত মাতি যাব ৷ লগতে ছাত্ৰ-ছাত্ৰীসকলৰ সুৰক্ষিত ভৱিষ্যতৰ কথা চিন্তা কৰি এটি কম্পিউটাৰ প্ৰশিক্ষণ কেন্দ্ৰৰো মুকলি কৰাৰ কথা ইতিমধ্যে চিন্তা কৰিছে গুইজান শাখা ছাত্ৰ সন্থাই ৷
আনহাতে, গুইজান শাখা ছাত্ৰ সন্থাৰ কাৰ্যালয়টো শুভ উদ্বোধন কৰিবলৈ উপস্থিত হোৱাৰ বাবে আছুৰ সাধাৰণ সম্পাদক শংকৰজ্যোতি বৰুৱাক ধন্যবাদ জ্ঞাপন কৰাৰ লগতে তিনিচুকীয়া জিলা ছাত্ৰ সন্থা, আঞ্চলিক ছাত্ৰ সন্থাৰ লগতে গুইজানৰ সমূহ ৰাইজক সহায় সহযোগিতা আগবঢ়োৱাৰ কাৰণে উপদেষ্টা সত্য বৰগোহাঁই ধন্যবাদ জ্ঞাপন কৰে ৷
লগতে পঢ়ক: Funeral ceremony of Uday Asom: ওপজা গাঁৱৰ মাটিত চিৰদিনলৈ বিলীন হ’ল লেঃ উদয় অসম
