শদিয়া, 14 জানুৱাৰীঃ নাগৰিকত্ব সংশোধনী আইন আন্দোলনে সমগ্ৰ ৰাজ্যতে তীব্ৰ ৰূপ ধাৰণ কৰাৰ সময়তে পুনৰ শদিয়াৰ এজন যুৱকে আলফা স্বাধীনত যোগদান কৰাৰ সন্দেহ ব্যক্ত কৰিছে যুৱকজনৰ পৰিয়ালে ৷ শদিয়াৰ পদুম পুখুৰী গাঁৱৰ দুলাল চন্দ্ৰ গগৈৰ পুত্ৰ নৱজ্যোতি গগৈ যোৱা তিনি জানুৱাৰীৰ পৰা সন্ধানহীন হৈ আছে। উল্লেখ্য যে সন্ধানহীন হৈ থকা নৱজ্যোতি গগৈ নামৰ যুৱকজন ডিব্ৰু মহাবিদ্যালয়ৰ গণিত বিভাগৰ ছাত্ৰ ৷ মহাবিদ্যালয়ৰ পৰাই বিগত তিনি তাৰিখৰ পৰা ছাত্রজন সন্ধানহীন হৈ পৰা খবৰ পৰিয়ালৰ লোকে শদিয়া আৰক্ষী থানাত এজাহাৰ দাখিল কৰে যদিও এই পৰ্যন্ত আৰক্ষীয়ে যুৱকজনৰ কোনো সম্ভেদ উলিয়াব পৰা নাই।
কিন্তু যুৱকজনে আলফা স্বাধীনত যোগদান কৰাৰ সন্দেহ প্ৰকাশ কৰি শোকত ভাগি পৰিছে পৰিয়ালৰ সকলো সদস্য। সেয়েহে তেওঁলোকৰ পুত্ৰই আলফাত যোগদান কৰা সম্পৰ্কত শীঘ্ৰে স্পষ্টীকৰণ বিচাৰি আলফা স্বাধীনৰ সেনাধ্যক্ষ পৰেশ বৰুৱালৈ সন্ধানহীন যুৱকৰ পৰিয়ালৰ কাতৰ আহ্বান ।
আৰু পঢ়কঃজালুকবাৰীত ফেশ্বন ডিজাইনাৰৰ আত্মহনন সন্দৰ্ভত তিনিজনক গ্ৰেপ্তাৰ
