ৰঙাপৰা, 24 জুলাই : কৰ’ণাতংক আৰু বানৰ মাজতে শোণিতপুৰ জিলাৰ ৰঙাপৰাত বনৰীয়া হাতীৰ মুক্ত বিচৰণ । ৰঙাপৰাত জাক জাক বনৰীয়া হাতীয়ে অৱস্থান কৰা পৰিলক্ষিত হৈছে । উল্লেখ্য যে, খাদ্যৰ সন্ধানত সোণাই-ৰূপাই অভয়াৰণ্যৰ পৰা অহা বৃহৎ বন্যহস্তীৰ জাকটোৱে গাভৰু নদী পাৰ হৈ ৰঙাপৰাৰ তাৰাজুলি চাহ বাগিচাত প্ৰৱেশ কৰে ।
ইয়াৰ পাচতে স্থানীয় ৰাইজৰ সহযোগত আমাৰীবাৰী বনাঞ্চলিক কাৰ্যালয়ৰ বনকৰ্মীয়ে আতচবাজী আৰু শূন্যলৈ গুলি ফুটাই বনৰীয়া হাতীৰ জাকটোক পুনৰ অভয়াৰণ্যখনলৈ খেদি পঠিয়াবলৈ সক্ষম হয় । বন্যহস্তীৰ জাকটোৱে কোনো ধৰণৰ ক্ষয়-ক্ষতি নকৰাকৈয়ে উভতি যোৱাত স্বস্তিৰ নিশ্বাস পেলাইছে বনকৰ্মী তথা অঞ্চলবাসীয়ে ।
ইফালে, তাৰাজুলি চাহ বাগিচাখনত বিগত কেইবা মাহ ধৰি বনৰীয়া হাতীয়ে উপদ্ৰৱ চলাই বিস্তৰ ক্ষতিসাধন কৰি অহাৰ ফলস্বৰূপে শংকিত হৈ পৰিছে বাগিচাখনত কৰ্মৰত শ্ৰমিকসকল ৷
লহতে পঢ়ক : বান বিভীষিকা : ৰাজ্যত জলমগ্ন 26 খন জিলা
