ৰঙাপৰাত অৰ্ধনিৰ্মিত কালভাৰ্ট :যাতায়াতত যাতনা

ৰঙাপৰাৰ আদাবাৰী-বালিপৰা সংযোগী পথত দুটাকৈ কালভাৰ্ট নিৰ্মাণ কৰিলে যদিও সম্প্ৰতি সেয়াও আধৰুৱা অৱস্থাতে থাকিল। ৷ যাতায়তৰ ক্ষেত্ৰত দুৰ্ভোগ ভুগিছে স্থানীয় ৰাইজে ৷

ৰঙাপাৰা, 10 ছেপ্তেম্বৰঃবুমেৰাঙত পৰিণত মুখ্যমন্ত্ৰী সৰ্বানন্দ সোণোৱাল নেতৃত্বাধীন চৰকাৰৰ দুৰ্নীতিৰ বিৰুদ্ধে শূন্য সহনশীলতাৰ নীতি। ৰাজ্যৰ পঞ্চায়ত আৰু গ্ৰামোন্নয়ন বিভাগত চলিছে অবাধ দুৰ্নীতি। কাম নকৰাকৈয়ে বিষয়া-ঠিকাদাৰে আত্মসাৎ কৰিছে কোটি টকা। শোণিতপুৰ জিলাৰ ৰঙাপৰা বিধানসভা সমষ্টিৰ আদাবাৰী চাহ বাগিচাত এটা পথত থকা দুটাকৈ আধৰুৱাকৈ নিৰ্মিত কালভাৰ্টে দুৰূহ কৰি তুলিছে অঞ্চলটোৰ যাতায়ত ব্যৱস্থা ৷ যাৰ বাবে অঞ্চলটোৰ ৰাইজ আৰু ছাত্ৰ-ছাত্ৰীসকলে অতি কষ্টেৰে বোকা-পানী গচকি অহা-যোৱা কৰিবলগীয়া হৈছে । উল্লেখ যে কালনি নদীৰ বাঢ়নি পানীয়ে পূৰ্বৰ কালভাৰ্টটো উটুৱাই লৈ যায় । পাছত ৰঙাপৰাৰ ফুলবাৰী গাঁও পঞ্চায়ত অধীনত থকা আদবাৰী-বালিপৰা সংযোগী পথচোৱাত থকা কালভাৰ্টটো পুনৰ নিৰ্মাণ কৰা হয় যদিও কালভাৰ্টটোৰ নিৰ্মাণ কাৰ্য সম্পূৰ্ণ নকৰাকৈ দায়িত্ব সামৰে পথটোৰ নিৰ্মাণৰ দায়িত্বত থকা কৰ্তৃপক্ষই । যাৰ ফলত আদাবাৰী, নিউ আদাবাৰী আৰু হাৰচূড়া চাহ বাগিচাৰ ৰাইজ আৰু ছাত্ৰ-ছাত্ৰীসকলে পথচোৱাৰে অহা-যোৱা কৰাত বাধাৰ সন্মুখীন হ'বলগীয়া হৈছে । আদাবাৰী-বালিপৰা সংযোগী পথৰ ওপৰত থকা পকী কালভাৰ্টটো নিৰ্মাণ কাৰ্য সম্পূৰ্ণ কৰি যাতায়তৰ ক্ষেত্ৰত উপযোগী কৰি তুলিবলৈ স্থানীয় ৰাইজে দাবী জনাইছে ।