তেজপুৰ,ডিচেম্বৰ ২৪ঃ শোণিতপুৰ জিলা ছাত্ৰ সন্থা আৰু তেজপুৰ আঞ্চলিক ছাত্ৰ সন্থাৰ উদ্যোগত অনুষ্ঠিত হয় কেন্দ্ৰীয় গণ সমাবেশ ৷ নাগৰিকত্ব সংশোধনী আইনৰ তীব্ৰ প্ৰতিবাদত এই সমাৱেশ আয়োজন কৰা হয় ৷ তেজপুৰৰ নেহেৰু মৈদানত অনুষ্ঠিত হয় এই বিশাল প্ৰতিবাদী সভা ৷ প্ৰায় ২৫ হাজাৰ লোকে অংশগ্ৰহণ কৰা প্ৰতিবাদী কাৰ্যসূচীত উপস্থিত থাকে সদৌ অসম ছাত্ৰ সন্থাৰ মুখ্য উপদেষ্টা ডঃ সমুজ্জল কুমাৰ ভট্টাচাৰ্য ৷ লগতে উপস্থিত থাকে সভাপতি দীপাংক নাথ, নেছ’ৰ অধ্যক্ষ চেমুৱেল জেওৰা, জাতীয়তাবাদী যুৱ ছাত্ৰ পৰিষদ, চাহ জনজাতি ছাত্ৰ সংগঠন, সদৌ অসম কৰ্মচাৰী পৰিষদৰ সভাপতি বাসৱ কলিতাকে ধৰি বহুকেইজন বিশিষ্ট ব্যক্তি ৷ প্ৰতিবাদকাৰীসকলে ৰং-তুলিকাৰে ব্যতিক্ৰমী প্ৰতিবাদ সাব্যস্ত কৰে ৷
আছুৰ সভাপতি দীপাংক নাথে ভাষণত অসম আন্দোলনৰ আৰম্ভণি তেজপুৰৰ পৰা হোৱা বুলি কয় ৷ প্ৰধানমন্ত্ৰী নৰেন্দ্ৰ মোদী আৰু অমিত শ্বাহৰ দম্ভালি অসমৰ ৰাইজে নামানে ৷ ইয়াৰ উত্তৰ ৰাইজে আগন্তুক সময়ত প্ৰদান কৰিব বুলিও নাথে উল্লেখ কৰে ৷
ইপিনে ডঃ সমুজ্জল কুমাৰ ভট্টাচাৰ্যই প্ৰধানমন্ত্ৰী আৰু অসম চৰকাৰক সংশোধনী নাগৰিকত্ব আইনখন বাতিল কৰিবলৈ আহ্বান জনায় ৷ সমান্তৰালকৈ বাসৱ কলিতাই ৩১ ডিচেম্বৰত কৰ্মচাৰী পৰিষদে "ক’লা দিৱস" পালন কৰিবলৈ লোৱা সিদ্ধান্তৰ কথা প্ৰকাশ কৰে ৷ বছৰটোৰ অন্তিম দিনত সকলো কৰ্মচাৰীক ক’লা বেজ পৰিধান কৰিবলৈ আহ্বান জনায় কলিতাই ৷
আনহাতে,নেছ’ৰ অধ্যক্ষ চেমুৱেলে প্ৰতিবাদস্থলীত নাগালেণ্ডৰ ৰাইজৰ প্ৰতিবাদৰ বিষয়ে উল্লেখ কৰে ৷ লগতে উত্তৰ-পূৰ্বাঞ্চলৰ সৰ্বস্তৰৰ লোক এই আইনৰ বিৰোধী বুলি প্ৰকাশ কৰে । নেছ’ই ভৱিষ্যতে এই আন্দোলনৰ সমৰ্থন কৰি যোৱাৰ কথাও চেমুৱেলে প্ৰকাশ কৰে ৷
লগতে চাওকঃগণ গৰ্জনত কঁপিল তিনিচুকীয়াৰ ৰাজপথ
