তেজপুৰ, ১০ এপ্ৰিল: ৰূপকোঁৱৰ জ্যোতিপ্ৰসাদ আগৰৱালাৰ অন্যতম সৃষ্টি 'শোণিত কুঁৱৰী' । ৰূপকোঁৱৰে ১৪ বছৰ বয়সতে ৰচনা কৰা অসমীয়া নাটকৰ ধ্বজাবাহী 'শোণিত কুঁৱৰী'য়ে গৰকিলে ১০০ বছৰ । ১০০ বছৰ উপলক্ষে ৰূপকোঁৱৰৰ স্মৃতি বিজড়িত ঐতিহ্যমণ্ডিত বাণ থিয়েটাৰত তেজপুৰৰ কুশীলৱৰ জৰিয়তে পুনৰ উদ্ভাসিত হৈ উঠিল 'শোণিত কুঁৱৰী'(Sonit kunwari staged on Ban Theatre) ।
অসম চৰকাৰৰ সাংস্কৃতিক সঞ্চালকালয়ৰ অধীনস্থ জ্যোতি ভাৰতীৰ শেহতীয়া এক আলোকসন্ধানী যাত্ৰাৰ অংশ হিচাপে তেজপুৰৰ দক্ষ নাট পৰিচালক পুলক কুমাৰ ডেকাৰ পৰিচালনাৰে ৰূপকোঁৱৰৰ এই কালজয়ী নাটকখন মঞ্চস্থ কৰা হয় । প্ৰতিকুল বতৰৰ মাজতে শনিবাৰে মঞ্চস্থ হোৱা নাটকখনি আনুস্থানিকভাৱে উদ্বোধন কৰে বিশিষ্ট অভিনেতা তথা তেজপুৰৰ বিধায়ক পৃথ্বিৰাজ ৰাভাই ।
আবৃত্তিকাৰ ৰুবী বৰাই আঁত ধৰা উদ্বোধনী অনুস্থানটোত পৃথ্বিৰাজ ৰাভাই নিজে বাণ থিয়েটাৰত বাণ ৰজাৰ চৰিত্ৰত অভিনয় কৰাৰ স্মৃতি ৰোমন্থন কৰে । লগতে পৰিচালক পুলক কুমাৰ ডেকাক এই প্ৰচেষ্টাৰ বাবে ধন্যবাদ জ্ঞাপন কৰে বিধায়কগৰাকীয়ে ।
নাট্যানুস্থানটোত উপস্থিত থাকে অসম ৰেপাৰেটৰীৰ সভাপতি ডাক্তৰ প্ৰদীপ লহকৰ, অসম সাহিত্য সভাৰ প্ৰচাৰ সম্পাদক তথা বাণ থিয়েটাৰৰ কাৰ্যনিৰ্বাহক সদস্য পংকজ বৰুৱা । বিশিষ্ট নৃত্যশিল্পী ড° প্ৰতিভা শৰ্মাৰ নৃত্য পৰিচালনাৰে নাটকখনত নৃত্যশিল্পীসকলে 'শোণিত কুঁৱৰী'ৰ প্ৰতিটো গীততে প্ৰাণ ঢালি নৃত্য প্ৰদৰ্শন কৰে ।
লগতে পঢ়ক: কেন্দ্ৰৰ প্ৰতিবেদনে উদঙাইছে ৰাজ্যৰ চৰকাৰী শিক্ষাখণ্ডৰ পঁয়া লগা অৱস্থা
