তেজপুৰ, ১১ জানুৱাৰী : উত্তৰ-পূৰ্বাঞ্চলত বৃদ্ধি পাইছে শীতৰ প্ৰকোপ । শীতৰ লগে লগে ন-ৰূপত প্ৰাণ পাই উঠিছে উত্তৰ-পূৰ্বাঞ্চলৰ পৰ্যটনস্থলীসমূহ । সোমাবাৰে অৰুণাচল প্ৰদেশৰ টাৱাঙৰ তাপমাত্ৰা ৪ ডিগ্ৰী চেলছিয়াছ । থেৰেঙা লগা জাৰৰ লগতে টাৱাঙৰ ছেলা পাছত পুৱাৰে পৰা আৰম্ভ হৈছে তুষাৰপাত ।
বৰফৰ শুকুলা চাদৰে ছানি ধৰিছে বাট-পথ, সু-উচ্চ পাহাৰ । যিফালেই চকু যায়, সেইফালে মাথোঁ বৰফ । ছেলা পাছৰ দৃষ্টিনন্দন সৌন্দৰ্য উপভোগ কৰি উৎফুল্লিত হৈ পৰিছে পৰ্যটক । বৰফবোৰ হাতেৰে চুই, খেলি পৰ্যটকসকল আনন্দিত হৈ পৰে ।
তুষাৰপাতে পৰ্যটকৰ মনত আনন্দ দিলেও ছেলা আৰু যশোৱান গড়ত সমস্যাৰ সৃষ্টি কৰিছে । বৰফে আৱৰি ধৰা বাবে আহুকালৰ সৃষ্টি হৈছে স্থানীয় লোকৰ মাজত । কোনো কোনো স্থানত পথৰ ওপৰতো বৰফ তৰপ পৰি যোৱা বাবে যাতায়াতৰ কৰাত সমস্যা আহি পৰিছে । উল্লেখ্য যে, তেজপুৰত সোমবাৰে বিয়লি ১৮ ডিগ্ৰী আৰু গুৱাহাটীত ২১ ডিগ্ৰী তাপমাত্ৰা আছিল ।
লগতে পঢ়ক:নগাঁও শিক্ষণ মহাবিদ্যালয়ৰ অধ্যক্ষাৰ বিৰুদ্ধে ষড়যন্ত্ৰৰ অভিযোগ
