ৰঙাপৰাত পথ দুৰ্ঘটনাত নিহত এজনঃ উত্তপ্ত পৰিস্থিতি

ৰঙাপৰাত সংঘটিত এক শোকাৱহ পথ দুৰ্ঘটনা ৷ থিতাতে নিহত এজন লোক ৷ ইয়াৰ পাছতে অঞ্চলটোত এক উত্তেজনাপূৰ্ণ পৰিস্থিতিৰ সৃষ্টি হয় ৷ দুৰ্ঘটনা সংঘটিত কৰা যুৱকজনক আটক কৰাৰ দাবীত স্থানীয় ৰাইজে অঞ্চলটোৰ গড়কাপ্তানী পথচোৱা অৱৰোধ কৰি পৰিস্থিতি উত্তাল কৰি তোলে ৷

ৰঙাপৰা, 19 ছেপ্তেম্বৰঃ শুকুৰবাৰে নিশা ৰঙাপৰাত সংঘটিত এক শোকাৱহ পথ দুৰ্ঘটনাত থিতাতে নিহত হয় এজন লোক । ঘটনাক কেন্দ্ৰ কৰি অঞ্চলটোত সৃষ্টি হয় এক উত্তপ্ত পৰিস্থিতি । ৰঙাপৰা-মিছামাৰী সংযোগী গড়কাপ্তানী পথৰ বৰজুলি চাহ বাগিচাৰ ১৭ নং লাইনত সংঘটিত হয় পথ দুৰ্ঘটনাটো । দুৰ্ঘটনাত মঙ্গল গোচাই নাম লোকজনৰ থিতাতে মৃত্যু হয় । নিশা দোকানৰ পৰা ঘৰলৈ গৈ থকা অৱস্থাত তীব্ৰবেগী AS 12N 1233 নম্বৰৰ এখন গ্লেমাৰ বাইকে প্ৰচণ্ড যোৰে খুন্দা মৰাত থিতাতে নিহত হয় মঙ্গল গোচাই ।

ইয়াৰ পাছতে বাগিচাখনত এক উত্তেজনাপূৰ্ণ পৰিস্থিতিৰ সৃষ্টি হয় ৷ দুৰ্ঘটনা সংঘটিত কৰা যুৱকজনক আটক কৰাৰ দাবীত স্থানীয় ৰাইজে গড়কাপ্তানী পথচোৱা অৱৰোধ কৰি পৰিস্থিতি উত্তাল কৰি তোলে ৷ পিছত ঘটনাস্থলীত ৰঙাপৰা আৰক্ষী উপস্থিত হৈ পৰিস্থিতি কিছু নিয়ন্ত্ৰণ কৰিবলৈ সক্ষম হয় । ইতিমধ্যে আৰক্ষীয়ে দুৰ্ঘটনা সংঘটিত কৰা যুৱকজনক আটক কৰা বুলি জানিব পৰা গৈছে । ৰঙাপৰাত একাংশ যুৱকে অনুজ্ঞাপত্ৰ অবিহনে গাড়ী অথবা মটৰ চাইকেল চলাই অহাৰ এক গুৰুত্বপূৰ্ণ অভিযোগ দীৰ্ঘদিনৰে পৰা উত্থাপান হৈ আহিছে ৷

লগতে পঢ়কঃ গোলাঘাটত ব্ৰহ্মপুত্ৰৰ ভয়াৱহ ৰূপঃ আতংকিত গঞা