তেজপুৰ, ২৪ চেপ্তেম্বৰ : ভাৰতৰ স্বাধীনতাৰ ৭৫ বছৰৰ লগত সংগতি ৰাখি সমগ্ৰ দেশতে পালন কৰা হৈছে ‘আজাদী কা অমৃত মহোৎসৱ’ ৷ ইয়াৰ অংশ হিচাপে শোণিতপুৰৰ জিলা পৰিষদ কাৰ্যালয়ৰ সন্মিলন কক্ষতো শুকুৰবাৰে শোণিতপুৰৰ জিলা উদ্যোগ আৰু বাণিজ্য কেন্দ্ৰৰ দ্বাৰা এক ৰপ্তানিকাৰীৰ বৈঠক অনুষ্ঠিত কৰা হয় । উপায়ুক্ত ভূপেশ চন্দ্ৰ দাসে বন্তি প্ৰজ্বলনেৰে আনুষ্ঠানিকভাৱে আজিৰ সন্মিলন উদ্বোধন কৰে ৷
চাহ, বস্ত্ৰ, কৃষি জাত সামগ্ৰী, খাদ্য সংসাধন উদ্যোগৰ লগত জড়িত প্ৰায় ১৯ টা আত্ম সহায়ক গোট, উদ্যমী, উদ্যোগপতি, ৰপ্তানিকাৰী প্ৰতিষ্ঠানে অংশগ্ৰহণ কৰে এই অনুষ্ঠানত । শোণিতপুৰ জিলাৰ সম্ভাব্য ৰপ্তানি সামগ্ৰীৰ ওপৰত এখন ৰপ্তানি হাত পুথিও মুকলি কৰা হয় । উপায়ুক্ত ভূপেশ চন্দ্ৰ দাসে ভাষণ প্ৰসংগত শোণিতপুৰৰ জিলা উদ্যোগ আৰু বাণিজ্য কেন্দ্ৰৰ প্ৰচেষ্টাক প্ৰশংসা কৰে ৷ লগতে অভিজ্ঞ ৰপ্তনিকাৰী সকলৰ অংশগ্ৰহণে সন্মিলনত অংশগ্ৰহণ কৰা সম্ভাব্য ৰপ্তনিকাৰী সকলৰ মনোবল বৃদ্ধি কৰাত সহায় কৰিব বুলি আশা প্ৰকাশ কৰে ।
ৰপ্তানিকাৰী সম্প্ৰদায়ৰ লগতে বিভিন্ন উদ্যোগীসকলক জিলাখনৰ অৰ্থনীতি সৱল কৰাৰ ক্ষেত্ৰত জিলা প্ৰশাসনৰ সৈতে সমন্বয় ৰক্ষা কৰি কাম কৰি যাবলৈ আহ্বান জনায় । এই ক্ষেত্ৰত জিলা প্ৰশাসনৰ তৰফৰ পৰা সকলো সম্ভৱপৰ সহায়-সহযোগিতা আগবঢ়োৱাৰ বাবে উপায়ুক্তগৰাকীয়ে আশ্বাস প্ৰদান কৰে ।
উদ্বোধনী ভাষণত জিলা উদ্যোগ আৰু বাণিজ্য কেন্দ্ৰৰ মহাপ্ৰবন্ধক ৰঞ্জন কুমাৰ ভট্টাচাৰ্যই কয় যে, এই সন্মিলনখন বাণিজ্য সপ্তাহৰ অংশ হিচাপে আয়োজন কৰা হৈছে ৷ শোণিতপুৰ জিলাৰ ৰপ্তানি ক্ষেত্ৰত এই অনুষ্ঠানে এক নতুন দিশৰ সূচনা কৰিব বুলি তেখেতে আশা প্ৰকাশ কৰে । বৈঠকখনে সম্ভাব্য ৰপ্তানিকাৰী আৰু সামগ্ৰী চিনাক্ত কৰাত আৰু জিলাখনক ৰপ্তানি কেন্দ্ৰ হিচাপে গঢ় দিয়াত সহায় কৰিব বুলিও আশা প্ৰকাশ কৰে ।
জিলা পৰিষদৰ মুখ্য কাৰ্যবাহী বিষয়া, তেজপুৰ বিশ্ববিদ্যালয়ৰ খাদ্য অভিযান্ত্ৰিক আৰু প্ৰযুক্তি বিভাগৰ অধ্যাপক ড৹ চাৰুলতা মহন্ত, তেজপুৰ বিশ্ববিদ্যালয়ৰ মেকানিকেল ইঞ্জিনিয়াৰিং বিভাগৰ অধ্যাপক ড৹ পাৰ্থ প্ৰতিম দত্ত, চাহ বোৰ্ডৰ সহকাৰী সঞ্চালক ড৹ অমৃতা চক্ৰৱৰ্তী এই কাৰ্যসূচীত বিশিষ্ট অতিথি হিচাপে উপস্থিত থাকে ।
সন্মিলনত কাৰিকৰী অধিৱেশনৰ বিশিষ্ট বক্তাসকলৰ ভিতৰত উপস্থিত থাকে মাহীশূৰৰ কেন্দ্ৰীয় খাদ্য প্ৰযুক্তিগত গৱেষণা প্ৰতিষ্ঠানৰ, মছলা আৰু সোৱাদ বিজ্ঞান বিভাগৰ ড৹ .বি.বি. বৰছে, কলকাতাৰ ভাৰতীয় পেকেজিং প্ৰতিষ্ঠানৰ উপ-সঞ্চালক বিধান দাস, এপিইডিএ ৰ সহকাৰী মহা প্ৰবন্ধক, সুনীতা ৰায়, পুণেৰ আদৰ্শ এগ্ৰিটেকৰ স্বত্বাধিকাৰী, বিকাশ নাগাৱাডে ।
অধিৱেশনত সংসাধিত খাদ্য ৰপ্তানি, চাহত মূল্য সংযোজন, মচলা প্ৰক্ৰিয়াকৰণ প্ৰযুক্তি আৰু মানদণ্ড, খাদ্য পেকেজিঙৰ শেহতীয়া প্ৰযুক্তি, কৃষি-সামগ্ৰীৰ ৰপ্তানি আৰু আমদানিৰ অভিজ্ঞতাৰ ওপৰত মত-বিনিময়, জিলা ৰপ্তানি পৰিকল্পনাৰ বিষয়ে আলোচনা কৰা হয় ৷ পিছত সম্ভাব্য ৰপ্তানিকাৰী সকলৰ দ্বাৰা সামগ্ৰীৰ বিষয়ে উপস্থাপন সম্পৰ্কে পৃথক অধিৱেশন আৰু ক্ৰেতা আৰু বিক্ৰেতাৰ মাজত মতবিনিময় অনুষ্ঠানৰো আয়োজন কৰা হয় ৷
লগতে পঢ়ক : তেল আৰু প্ৰাকৃতিক গেছৰ প্ৰকল্পৰ বাবে উত্তৰ-পূৰ্বাঞ্চললৈ এক লাখ কোটি টকাৰ অনুমোদন
