তেজপুৰ,৭ ডিচেম্বৰ: তেজপুৰত ভিজিলেঞ্চ এণ্ড এণ্টিকৰাপশ্যন বিভাগৰ অভিযান ৷ জালত পৰিল APDCLৰ তেজপুৰস্থিত শীৰ্ষ বিষয়া ৷ উৎকোচ লোৱাৰ সময়তে শুকুৰবাৰে হাতে লোটে ধৰা পৰিল তেজপুৰ টেষ্টটিং এণ্ড কমিচনিং ডিভিজনৰ সহকাৰী জেনেৰেল মেনেজাৰ প্ৰকাশ ৰঞ্জন দত্ত ৷
উল্লেখ্য যে,মিছন চাৰিআলিৰ KF নামৰ হোটেল খনত ঠিকাদাৰৰ পৰা ৮০ হেজাৰ টকা উৎকোচ লোৱাৰ সময়তে দুৰ্নীতি নিবাৰক শাখাই গ্ৰেপ্তাৰ কৰে বিষয়া গৰাকীক ৷ ঠিকাদাৰ দিগন্ত গোস্বামীৰ পৰা তিনি লাখ টকা উৎকোচ বিচাৰিছিল প্ৰকাশ ৰঞ্জন দত্তই ৷ ডাবৰ কোম্পানীত চ'লাৰ মিটাৰ লগোৱাৰ বাবে বিচাৰিছিল তিনি লাখ টকাৰ উৎকোচ ৷ তিনি লাখ টকাৰ পৰা পাচত দুয়ো গৰাকীৰ মাজত বন্দোবস্তি হৈছিল ৮০ হেজাৰ টকাত ৷ তাৰ পাচতে প্ৰকাশ ৰঞ্জন দত্তৰ বিৰুদ্ধে ঠিকাদাৰ দিগন্ত গোস্বামীয়ে অভিযোগ উত্থাপন কৰিছিল দুৰ্নীতি নিবাৰক শাখাত ৷ এই উৎকোচ কাণ্ডৰ লগত সংমণ্ডলটোৰ সহকাৰী মেনেজাৰ জীতেন কুমাৰ ঢেকিয়াল ফুকন নামৰ বিষয়াজনো জড়িত থকাৰ অভিযোগ ঠিকাদাৰ গৰাকীৰ ৷ ইতিমধ্যে ঢেকিয়াল ফুকনৰ বিৰুদ্ধে নগাঁৱত অভিযান চলাইছে দুৰ্নীতি নিবাৰক শাখাই ৷
আৰু পঢ়কঃ টীয়কৰ বিধায়িকা ৰেনুপমা ৰাজখোৱাৰ ছুইচাইড নোট উদ্ধাৰ
