তেজপুৰ, 7 এপ্ৰিলঃ মন্ত্ৰী পল্লৱলোচন দাসৰ সমষ্টি পানবাৰী গাঁওত এতিয়াও নেপালে বিদ্যুৎ সংযোগ ৷ চাকিৰ পোহৰেই একমাত্ৰ সম্বল গাঁওবাসীৰ ৷
উল্লেখ্য যে তেজপুৰ লোকসভা সমষ্টিৰ বিজেপি প্ৰাৰ্থী পল্লৱ লোচন দাসক বহু আবেদন নিবেদন কৰাৰ পাছতো গাঁৱবাসীক বিদ্যুৎ সুব্যৱস্থা কৰি নিদিয়াত লোকসভা নিৰ্বাচনত পল্লৱ লোচন দাসক ভোট নিদিয়াৰ সিদ্ধান্ত লয় ৰাইজে ৷ চাকিৰ পোহৰেই একমাত্ৰ সম্বল তেওঁলোকৰ । প্ৰধানমন্ত্ৰী নৰেন্দ্ৰ মোডী চৰকাৰৰ সৌভাগ্য আঁচনিৰ জৰিয়তে সকলো গাঁৱতেই বিদ্যুৎৰ সংযোগ দিয়া হ'ব বুলি কৰা মন্তব্যৰ বিপৰীতে এই দৃশ্যই উদঙাইছে মোডী চৰকাৰৰ সৌভাগ্য আঁচনিৰ ফোপলা স্বৰূপটো ৷ প্ৰায় ২৫০ টা আদিবাসী জনগোষ্ঠীয় পৰিয়ালে দীৰ্ঘদিনৰে পৰা বসবাস কৰি থকা পানবাৰী অকাবস্তিত আজিও কেৰাচিন তেলৰ চাকিৰেই কষ্টকৰ জীৱন অতিবাহিত কৰিছে । গাঁওখনৰ ছাত্ৰ-ছাত্ৰী সকলে চাকি আৰু লেমৰ পোহৰতেই অধ্যয়ন কৰিবলগীয়া হৈছে । তাৰোপৰি গাঁওখনত পোহৰৰ ব্যৱস্থা নকাৰৰ বাবেই ইতিমধ্যে কেইবাজনো লোক বনৰীয়া হাতীৰ আক্ৰমণত অকাল মৃত্যুক সাৱটি লৈছে । ৰঙাপৰাৰ স্থানীয় বিধায়ক পল্লৱ লোচন দাস শক্তি মন্ত্ৰী হোৱাৰ পাছতো পানবাৰী অকাবস্তি গাঁৱৰ ৰাইজে গাঁওখনত আজি লৈকে নাপালে বিদ্যুৎ সংযোগ ৷ এতিয়া প্ৰশ্ন হয় স্বাধীনতাৰ 70 বছৰ পিছতো বিদ্যুৎৰ পোহৰ নপৰা গাঁওখনলৈ চৰকাৰ তথা বিদ্যুৎ বিভাগৰ চকু পৰিবনে, নে এনেকৈয়ে নিৰ্বাচনী বৈতৰনী পাৰ কৰি গাদি দখল কৰি থাকিব বছৰ পিছত বছৰ? নে এনেকৈয়ে এন্ধাৰৰ জীৱন অতিবাহিত কৰি থাকিব লাগিব পানবাৰী ৰাইজে ?
