তেজপুৰ,৪ আগষ্ট : চলিত বৰ্ষৰ জানুৱাৰী মাহৰ শেহৰ ফালে বিশ্বব্যাপী প্ৰাদুৰ্ভৱ ঘটিছিল কৰ’ণা ভাইৰাছৰ ৷ ক্ৰমান্বয়ে ই মহামাৰীৰ ৰূপ ধাৰণ কৰি সমগ্ৰ বিশ্বতে তাণ্ডৱৰ সৃষ্টি কৰিছিল ৷ এনে অৱস্থাৰ উদ্ভৱ হৈছিল য়ে, আমেৰিকাৰ দৰে দেশত অভাৱ ঘটিছিল শ্মশানৰ ৷ অসমতো শ্মশানত মৃতকৰ সৎকাৰৰ ক্ষেত্ৰত কেতবোৰ অভাৱনীয় পৰিস্থিতিৰ সৃষ্টি হোৱা দেখা গৈছে ৷
সম্প্ৰতি সমাজত এক ভয়াবহ সমস্যা হিচাপে দেখা দিছে শ্মশানত শেষকৃত্য সম্পন্ন কৰা কাৰ্য । এজন লোকৰ মৃত্যু ঘটিলে শেষকৃত্যৰ সময়ত বহু যোজন দূৰৰ পৰা লোক আহি গোট খায় অন্তিম শ্ৰদ্ধাঞ্জলি জ্ঞাপন কৰে । কিন্তু এতিয়া আৰু সেইয়া যেন শেষ হৈ পৰিছে । এতিয়া এই শেষকৃত্যৰ বাবেও একাংশই ৰাজহুৱা শ্মশানত ঠাই নিদিয়া হৈছে , কাৰণ ভয়াবহ মহামাৰী ন’ভেল কৰ'না ভাইৰাছ ।
অসমৰ বিভিন্ন প্ৰান্তত এতিয়া মানুহৰ মৃত্যু হোৱাৰ পাচত গাঁৱৰ মাজেদি শ্মশানলৈ নিয়াতো বাধা নিদিয়ে আৰু ওচৰৰ স্থানীয় শ্মশানত শেষকৃত্য সমাপন কৰিবলৈ নিদিয়াৰ অভিযোগ উঠিছে । কিন্তু এই ক্ষেত্ৰত চৰকাৰ তথা প্ৰশাসনে যৎপাৰোনাস্তি চেষ্টা কৰিও ব্যৰ্থ হ’বলগীয়া হৈছে । আৰক্ষী আৰু জিলা প্ৰশাসনে মৃতদেহ লৈ শেষকৃত্য কৰিবলৈ ঘূৰি ফুৰিব লগা হৈছে ৷
এজন লোক ক’ভিড-১৯ ত আক্ৰান্ত হোৱাৰ পাচত মৃত্যু হ’লে সেই মৃতদেহৰ পৰা পুনৰ সংক্ৰমণৰ আশংকা আছে নেকি ? যদি আছে স্বাস্থ্য বিভাগে দিয়া সেই নিয়ম অনুসৰি শেষকৃত্য সম্পন্ন কৰিলে কেনেকৈ অসুবিধা হ’ব পাৰে ?
উল্লেখযোগ্য যে, শোণিতপুৰ জিলাৰ উপায়ুক্ত মানবেন্দ্ৰ প্ৰতাপ সিঙৰ সাধাৰণ ৰাইজৰ প্ৰতি আহ্বান, যে এনে ধৰণৰ লোকক অৱহেলা নকৰি স্বাস্থ্য বিভাগে প্ৰদান কৰা নিয়ম অনুসৰি শেষকৃত্য সম্পন্ন কৰা উচিত । এগৰাকী ক’ভিড ৰোগীৰ মৃত্যুৰ পাচত শেষকৃত্য সম্পন্ন কৰাক লৈ স্থানীয় ৰাইজ আৰু আৰক্ষীৰ তেজপুৰত তৰ্কাতৰ্কিৰ সৃষ্টি হয়, পৰিণতিত মৃতদেহ গাড়ীত ,লৈ ঘূৰাই ফুৰাব লগীয়া হৈছিল প্ৰশাসন । দুদিন আগলৈ অসম উদ্যোগ সুৰক্ষা বাহিনীৰ এগৰাকী পৰিদৰ্শক ক’ভিড ৰোগত আক্রান্ত হৈ মৃত্যু হোৱাত এইদৰে ঘূৰাই আনিব লগীয়া হয় তেজপুৰ বাঁহবাৰী শ্মশানৰ পৰা । ক’ভিড ৰোগীৰ মৃত্যুৰ পাচত সৃষ্টি হোৱা এনে অভাৱনীয় পৰিস্থিতি দূৰীকৰণৰ বাবে প্ৰশাসন আৰু ৰাইজে উপযুক্ত পদক্ষেপ লোৱা উচিত
লগতে পঢ়ক : লুইতৰ বুকুত সমূহীয়া আত্মজাহৰ হুংকাৰ দক্ষিণ শালমাৰাবাসীৰ
