বিয়াৰ মাছ-ভাত খাই বিষক্ৰিয়াত আক্ৰান্ত দুই শতাধিক লোক

শোণিতপুৰৰ বৰছলা বিধানসভা সমষ্টিৰ এক অঞ্চলত প্ৰায় দুই শতাধিক লোক বিষক্ৰিয়াত আক্ৰান্ত হোৱাত অঞ্চলটোত হাঁহাকাৰ পৰিস্থিতিৰ উদ্ভৱ হৈছে (People Suffer Food Poisoning After Attending Wedding Feast) ৷ বিষক্ৰিয়াত আক্ৰান্তৰ সংখ্যা সম্প্ৰতি ১১০ গৰাকী হৈছে । ভালেসংখ্যক লোকক ভৰ্তি কৰোৱা হৈছে তেজপুৰ চিকিৎসা মহাবিদ্যালয় হাস্পতালত ৷

তেজপুৰ, ৫ মে’: শোণিতপুৰৰ বৰছলা বিধানসভা সমষ্টিৰ এক অঞ্চলত প্ৰায় দুই শতাধিক লোক বিষক্ৰিয়াত আক্ৰান্ত হোৱাত অঞ্চলটোত হাঁহাকাৰ পৰিস্থিতিৰ উদ্ভৱ হৈছে (People Suffer Food Poisoning After Attending Wedding Feast) ৷ এখন বিয়াৰ অভ্যৰ্থনাৰ খাদ্যৰ পৰাই এই বিষক্ৰিয়া হোৱাৰ আশংকা কৰা হৈছে ৷ মঙলবাৰে নিশাৰে পৰা আৰম্ভ হোৱা এই বিষক্ৰিয়াত আক্ৰান্তৰ সংখ্যা সম্প্ৰতি ১১০ গৰাকী হৈছে । এই ঘটনাৰ পাছতে শোণিতপুৰ প্ৰশাসনৰ নিৰ্দেশত আনকি অস্থায়ী স্বাস্থ্য শিবিৰ স্থাপন কৰি আক্ৰান্ত সকলক স্বাস্থ্য বিভাগে প্ৰয়োজনীয় চিকিৎসাৰ ব্যৱস্থা কৰিবলগীয়া হোৱাৰ উপৰি ভালেসংখ্যক লোকক তেজপুৰ চিকিৎসা মহাবিদ্যালয় হাস্পতালত ভৰ্তি কৰোৱা হৈছে ৷ বুধবাৰৰ নিশালৈকে আক্ৰান্তৰ সংখ্যা বৃদ্ধি পোৱাত প্ৰকৃততে কিমান সংখ্যক লোক আক্ৰান্ত হৈছে তাৰ নিৰ্দিষ্ট সংখ্যা ওলোৱা নাই যদিও আক্ৰান্তৰ সংখ্যা প্ৰায় দুই শতাধিক হব বুলি আশংকা কৰিছে স্থানীয় লোকে ৷

উল্লেখযোগ্য যে, কালি অৰ্থাৎ বুধবাৰে বৰছলাৰ পুঠিমাৰি বাপুভেটি গাঁৱৰ প্ৰসন্ন বৰাৰ বিয়াৰ অভ্যৰ্থনা আছিল ৷ সমগ্ৰ গাঁওখনৰ লগতে আন অঞ্চলৰ বহু সংখ্যক লোক অভ্যৰ্থনালৈ আহিছিল আৰু সকলোৰে বাবে ৰূপচন্দা মাছৰে ভাতৰ ব্যৱস্থা কৰা হৈছিল ৷ অভ্যৰ্থনাৰ আহাৰ গ্ৰহণ কৰা বাপুভেটি গাঁৱৰ শতাধিক লোক নিশালৈ মূৰৰ বিষ, বমি আৰু পায়খানাত আক্ৰান্ত হয় ৷ এই সংখ্যা ক্ৰমান্বয়ে বৃদ্ধি পোৱাত অঞ্চলটোত হাঁহাকাৰ লাগে আৰু নিশায়েই একাংশ লোকক টুমুকিস্থিত তেজপুৰ চিকিৎসা মহাবিদ্যালয় হাস্পতাললৈ অনা হয় ৷ উল্লেখযোগ্য যে আজি পুৱালৈ অঞ্চলটোত এনে আক্ৰান্তৰ সংখ্যা আৰু বৃদ্ধি পায় ৷ তেজপুৰ চিকিৎসা মহাবিদ্যালয়ত আক্ৰান্তৰ সংখ্যা ক্ৰমাৎ বৃদ্ধি পাই অহাত এই সন্দৰ্ভত শোণিতপুৰ প্ৰশাসনকো জনোৱা হয় ৷

প্ৰশাসনৰ নিৰ্দেশত জিলা স্বাস্থ্য বিভাগে বিবাহ অনুষ্ঠিত হোৱা প্ৰসন্ন বৰাৰ ঘৰৰ চৌহদতে এটা অস্থায়ী চিকিৎসা শিবিৰ মুকলি কৰি অঞ্চলটোৰ শতাধিক বিষক্ৰিয়াত আক্ৰান্ত লোকক প্ৰয়োজনীয় চিকিৎসাৰ ব্যৱস্থা কৰে ৷ ইয়াত চিকিৎসা গ্ৰহণ কৰা লোকৰ সংখ্যাও সময় আগবঢ়াৰ লগে লগে বৃদ্ধি পোৱাৰ বিপৰীতে তেজপুৰ চিকিৎসা মহাবিদ্যালয় হাস্পতালতো অৰ্দ্ধশতাধিক লোকক চিকিৎসা প্ৰদান কৰা হয় ৷ এই ঘটনা সন্দৰ্ভত দৰাৰ খুড়াক বীৰেন চন্দ্ৰ বৰাই কয় যে,যদিও ভাতৰ স’তে ৰূপচন্দা মাছৰ আঞ্জা পৰিৱেশন কৰা হৈছিল, তথাপিও এই বিষক্ৰিয়াৰ প্ৰকৃত কাৰণ এই পৰ্যন্ত নিশ্চিত হোৱা নাই ৷ অৱশ্যে প্ৰাথমিক অৱস্থাত মাছেই বিষক্ৰিয়াৰ কাৰণ বুলি ৰাইজে আশংকা প্ৰকাশ কৰিছে ৷

ইতিমধ্যে খাদ্য পৰিদৰ্শকে ঘটনাস্থলীৰ পৰা খাদ্যৰ নমুনা সংগ্ৰহ কৰিছে পৰীক্ষাৰ বাবে ৷ বৰ্তমানেও বহুলোক আক্ৰান্ত হোৱাৰ তথ্য পোহৰলৈ আহি থকাৰ উপৰি তেজপুৰ চিকিৎসা মহাবিদ্যালয় হাস্পতাললৈ বহু আক্ৰান্ত লোক চিকিৎসাৰ বাবে গৈয়েই আছে ৷ গাঁওখনত এইপৰ্যন্ত খাদ্যৰ এই বিষক্ৰিয়াক লৈ আতংক অব্যাহত থকাৰ বিপৰীতে চিকিৎসা লাভ কৰা একাংশ ক্ৰমান্বয়ে সুস্থ হৈ উঠিছে ৷

লগতে পঢ়ক: অনুজ্ঞাপত্ৰ অবিহনে ব্যৱসায় চলাই বিপদত পৰিল ডমিন'জ আৰু কে এফ চি