তেজপুৰ, 4 জানুৱাৰী : সোমবাৰে কেন্দ্ৰীয় মন্ত্ৰী কিৰেণ ৰিজিজুৱে উদ্বোধন কৰিলে অসম ৰাইফলছৰ উদ্যোগত নিৰ্মাণ কৰা অসম ৰাইফলছ পাব্লিক স্কুল ৷ উল্লেখ্য যে, ক্ৰীড়াক্ষেত্ৰৰ উত্তৰণৰ বাবে স্থাপন কৰা হৈছে এই বিদ্যালয় ৷ উত্তৰ-পূৰ্বাঞ্চলত এইখনেই হৈছে প্ৰথম খন ক্ৰীড়া বিদ্যালয় ৷ হাৰিয়ানাৰ সাণিপটত আছে এম এল এন স্কুল অৱ স্প’ৰ্টচ ৷ তাৰেই আৰ্হিৰে গঢ়ি তোলা হৈছে এই বিদ্যালয়খন ৷ ভাৰত চৰকাৰৰ খেলো ইণ্ডিয়া কাৰ্যক্ৰমৰ অধীনত ইয়াক স্থাপন কৰা হৈছে ৷
কেন্দ্ৰীয় মন্ত্ৰী কিৰেণ ৰিজিজু আৰু অসম ৰাইফলছৰ মহানিৰ্দেশক লেফটেনেন্ট জেনেৰেল সুখদ্বীপ চাংৱানে(AVSM,SM) ভাৰতীয় ক্ৰীড়া প্ৰাধিকৰণ আৰু আসম ৰাইফলছৰ মাজত হোৱা বুজাবুজি চুক্তিখন এই উদ্বোধনী অনুস্থানতে ৰাজহুৱা কৰে ৷ এই বিশেষ মূহুৰ্তত মন্ত্ৰী ৰিজিজুৱে অসম ৰাইফলছৰ মহানিৰ্দেশক গৰাকীয়ে উত্তৰ-পূৱত ক্ৰীড়া বিদ্যালয় স্থাপনৰ বাবে লোৱা পদক্ষেপৰ শলাগ লয় ৷ ইয়াৰ লগতে এ আৰ পিএছ, লেইটকৰ আদি ভৱিষ্যতৰ একো একোজন বিজয়ী খেলুৱৈ গঢ়াৰ ভেটি হ’ব বুলিও মন্তব্য কৰে ৰিজিজুৱে ৷
এ আৰ পি এছ, লেইটকৰে আৰ্চাৰী, এথলেটিকছ আৰু ফেঞ্চিঙৰ বাবে প্ৰশিক্ষণৰ সুবিধা লাভ কৰিব ৷ ভাৰতীয় ক্ৰীড়া প্ৰাধিকৰণে এই প্ৰতিটো খেলৰ বাবে 50 গৰাকী ল’ৰা আৰু 50 গৰাকী ছোৱালীৰ দায়িত্ব গ্ৰহণ কৰিব ৷ প্ৰতিভাক গুৰুত্ব দি বাচনি প্ৰক্ৰিয়া চলোৱা হ’ব আৰু দুৰ্গম আৰু পিচপৰা অঞ্চলৰ শিশু সকলেও ইয়াত স্থান লাভ কৰিব ৷ অসম ৰাইফলছে উত্তৰ-পূৰ্বাঞ্চলৰ কেইবাগৰাকীও আগশাৰীৰ খেলুৱৈক এই অনুষ্ঠানলৈ আমন্ত্ৰণ জনাই তেওঁলোকক বিশেষ সন্মান প্ৰদান কৰে ৷
লগতে পঢ়ক : অসমত আঞ্চলিকতাবাদ-জাতীয়তাবাদৰ ভেটি সবল কৰিব AJYCPয়ে!
