তেজপুৰ, 24 জুলাই : ভাৰতীয় ৰেড ক্ৰছ ছ’চাইটিৰ (আই আৰ চি এছ), নতুন দিল্লীৰ এটা দলৰ মণিপুৰৰ ৰাজ্যপালক সাক্ষাৎ ৷ দুৰ্যোগ ব্যৱস্থাপনা বিভাগৰ উপদেষ্টা ৰীণা ত্ৰিপাঠী আৰু পৰিচালন সমিতিৰ সদস্য ড৹ অশোক কুমাৰ সিঙৰ নেতৃত্বত মণিপুৰৰ আই আৰ চি এছৰ অধ্যক্ষ নৰেন্দ্ৰ নিংগোম্বা আৰু আন দুজন সদস্যৰ সৈতে ৰাজভৱনত মণিপুৰৰ ৰাজ্যপাল অনুছুইয়া উইকেক সাক্ষাৎ কৰে ৷ ৰাজ্যপাল গৰাকীক সাক্ষাৎ কৰি দলটোৱে সাহায্য শিবিৰসমূহৰ প্ৰচলিত অৱস্থা আৰু সাহাৰ্য শিবিৰত থকা স্থানীয় গৃহহীন লোকসকলে সন্মুখীন হোৱা সমস্যাসমূহৰ বিষয়ে অৱগত কৰে ৷
দলটোৱে ৰাজ্যপালক অৱগত কৰে যে, তেওঁলোকে ইম্ফল পূব, ইম্ফল পশ্চিম, বিষ্ণুপুৰ, চুৰাচান্দপুৰ, কাকচিং আৰু থৌবাল জিলাৰ বিভিন্ন সাহায্য শিবিৰ পৰিদৰ্শন কৰিছে ৷ শিবিৰত থকা লোকসকলক সাক্ষাৎ কৰি তেওঁলোকক কি কি সা-সুবিধা প্ৰদান কৰা হৈছে সেই বিষয়েও অনুসন্ধান কৰে দলটোৱে ৷
তেওঁলোকে আৰু অৱগত কৰে যে, অধিকাংশ শিবিৰতে অনাময় ব্যৱস্থাৰ উন্নীত কৰাৰ প্ৰয়োজন আৰু কিছু সংখ্যক শিবিৰত জনসমাগম হোৱাৰ লগতে অত্যাৱশ্যকীয় ঔষধৰ নাটনি দেখা গৈছে ৷ বিশেষকৈ চুৰাচান্দপুৰ জিলাত এই সমস্যা দেখা গৈছে ৷ কেন্সাৰ, ডায়েবেটিছ আৰু বৃক্কৰ সমস্যাৰ দৰে ৰোগত আক্ৰান্ত ৰোগীয়েও সাহায্য় শিবিৰ সমূহত আশ্ৰয় লৈ আছে আৰু তেওঁলোকক বিশেষ গুৰুত্ব দিয়াৰ প্ৰয়োজন বুলি উল্লেখ কৰে দলটোৱে ৷
দলটোৱে ৰাজ্যপালৰ ওচৰত বিতং প্ৰতিবেদন দাখিল কৰি ক্ষতিগ্ৰস্ত লোকসকলে সন্মুখীন হোৱা অসুবিধাৰ বিষয়ে চোৱাচিতা কৰাৰ লগতে তেওঁলোকক সহায়ৰ বাবে প্ৰয়োজনীয় ব্যৱস্থা গ্ৰহণ কৰিবলৈ অনুৰোধ জনায় ৷ দলটোৱে প্ৰশিক্ষিত স্বেচ্ছাসেৱকৰ জৰিয়তে মানসিক-সামাজিক সহায় আৰম্ভ কৰা, সাহাৰ্য শিবিৰৰ ভিতৰত আৰু ইয়াৰ আশে-পাশে পৰিষ্কাৰ-পৰিচ্ছন্নতাৰ অভিযান আৰু বিদ্যালয়লৈ যোৱা ছাত্ৰ-ছাত্ৰীৰ বাবে সুস্থতা কাৰ্যসূচী গ্ৰহণ কৰাৰ বাবেও পৰামৰ্শ দিয়ে ৷ ৰাজ্যপালে তেওঁলোকক আশ্বাস দিয়ে যে, সাহায্য শিবিৰত থকা হিংসাত্মক ঘটনাত ক্ষতিগ্ৰস্ত লোকসকলক সকলো ধৰণৰ সহায় আগবঢ়োৱা হ’ব ৷
ৰাজ্যপালে কয় যে, তেওঁ নিজেই পাহাৰ আৰু ভৈয়ামৰ জিলাৰ বহু সাহাৰ্য শিবিৰ পৰিদৰ্শন কৰিছিল আৰু মাজে মাজে ক্ষতিগ্ৰস্ত লোকসকলৰ সৈতে মত বিনিময় কৰিছিল ৷ তেওঁ আৰু কয় যে, সাহাৰ্য শিবিৰত থকা আৰ্তজনক সকলো প্ৰয়োজনীয়তা প্ৰদানৰ বাবে বিশেষ ব্যৱস্থা গ্ৰহণ কৰিবলৈ মুখ্য সচিবক নিৰ্দেশ দিছে ৷
ৰাজ্যপালে আই আৰ চি এছৰ প্ৰতিনিধি দলটোক সাহাৰ্য শিবিৰত যান-জঁট কম কৰিবলৈ তম্বুৰ ব্যৱস্থা কৰাৰ বাবে পৰামৰ্শ দি কয় যে, যিসকলক সহায়ৰ প্ৰয়োজন হৈছে তেওঁলোকক অগ্ৰাধিকাৰ দিয়া উচিত ৷ ৰাজ্যপালে দলটোক সংশ্লিষ্ট জিলা প্ৰশাসনৰ লগত আলোচনা কৰি সামগ্ৰী বিতৰণ কৰিবলৈ কয় ৷ মানৱতাৰ স্বাৰ্থত এটা দানশীল সংস্থা হিচাপে সম্ভৱপৰ সকলো সহায় আগবঢ়োৱাৰ বাবে দলটোক ধন্যবাদ জনায় ৰাজ্যপাল গৰাকীয়ে ৷
লগতে পঢ়ক : Manipur Crisis: মণিপুৰ সন্দৰ্ভত চৰকাৰৰে আলোচনাত বহিব নোখোজে বিৰোধী; মন্ত্ৰী অনুৰাগ
