তেজপুৰ, ৩০ অক্টোবৰ : ভাৰত আৰু মালয়েছিয়ান সেনাৰ মাজত এক যুটীয়া অনুশীলন 'হৰিমাউ শক্তি-২০২৩' বৰ্তমান তীব্ৰ গতিত চলি আছে । এই অনুশীলন ২৩ অক্টোবৰৰ পৰা মেঘালয়ৰ উমৰৈ কেণ্টনমেণ্টৰ বিদেশী প্ৰশিক্ষণ নোডত অনুষ্ঠিত হৈছে । দুয়োখন দেশৰ সেনাবাহিনীৰ এই যুটীয়া অনুশীলন অহা ৫ নৱেম্বৰলৈকে চলিব । উল্লেখ্য যে এই অনুশীলনত মহিলা কেডাৰেও অংশগ্ৰহণ কৰিছে ।
আন্তঃকাৰ্যকাৰিতা লাভৰ লক্ষ্যৰে দুয়োটা সেনাবাহিনীয়ে বিগত এসপ্তাহ ধৰি এই অনুশীলন চলাই আহিছে । দুয়োখন দেশৰে সেনা দলক এই অনুশীলনত যুদ্ধৰ পৰিস্থিতি আৰু কৌশলগত প্ৰশিক্ষণ প্ৰদান কৰা হৈছে । ইয়াত আছে ফায়াৰিং ড্ৰিল আৰু 'যুদ্ধ কঠোৰ' কামৰ ছেছন ।
এই প্ৰশিক্ষণত হেলেব'ৰ অভিযান, ৰক ক্লাইম্বিং, অৰণ্য়ত বাচি থকাৰ কৌশল আৰু ৰিফ্লেক্স শ্বুটিং, স্নাইপাৰৰ প্ৰয়োগ, আইইডি আৰু কাউণ্টাৰ আইইডি ড্ৰিল, এএমএআৰ (আৰ্মি মাৰ্শ্বেল আৰ্ট ৰুটিন) আদিৰ অন্তৰ্ভুক্তিৰে অৰণ্য়ত সেনাৰ বিশেষ প্ৰশিক্ষণৰ ওপৰত বিশেষ গুৰুত্ব দিয়া হৈছে । আনহাতে, ভাৰত আৰু মালয়েছিয়ান দল দুটাই ইটোৱে সিটোৰ কাৰ্যকৰী প্ৰক্ৰিয়া আৰু অনুশীলনৰ সৈতে পৰিচিত হোৱাৰ সুযোগ লাভ কৰিছে ।
এই যুটীয়া প্ৰশিক্ষণটো ৪৮ ঘণ্টীয়া অনুশীলন সময়ৰ । ইয়াৰ উদ্দেশ্য হৈছে উপ মহাদেশীয় পৰিৱেশত কৌশলগত আখৰা । হৰিমাউ শক্তি-৪ ২০২৩ অনুশীলনত কমাণ্ড পোষ্ট এক্সাৰচাইজ (চিপিএক্স) হৈছে তালিকাৰ শীৰ্ষ পৰিকল্পনা । এই প্ৰশিক্ষণ কাৰ্যসূচীত ইউনিট কমাণ্ডাৰ আৰু ষ্টাফ বিষয়াসকলৰ কাৰ্যকৰী পৰিকল্পনা প্ৰস্তুতকৰণৰ সামৰ্থ্যৰ ওপৰত গুৰুত্ব দিয়া হৈছে ।
হৰিমাউ-৪ অভিযানৰ সময়ত ইয়াক কম্পিউটাৰ স্ক্ৰীণ, মানচিত্ৰত ট্ৰেক কৰা হয় । আনহাতে, নকল বিদ্ৰোহী গোটবোৰে পুনৰ যুঁজ দিয়ে । হৰিমাউ শক্তি-৪ চিপিএক্সে শান্তি প্ৰৱৰ্তনৰ মৌলিক ধাৰণা আৰু সপ্তম অধ্যায়ৰ আদেশৰ ওপৰত পৰিকল্পনা কৰিছে । উমৰৈত তিনি দিনৰ সময়ছোৱাত বিদ্ৰোহীৰ গোপন শিবিৰত অনুসন্ধান অভিযানৰ ওপৰত দুটা কৌশলগত কাৰ্যকৰী অভিযানৰ পৰিকল্পনা কৰা হৈছে ।
চিপিএক্সত পদাতিক, আৰ্টিলাৰী আৰু অভিযন্তা, সংকেত আৰু লজিষ্টিকৰ পৰা আৰম্ভ কৰি যুদ্ধৰ বাবে প্ৰয়োজনীয় প্ৰতিটো সম্পদ অন্তৰ্ভুক্ত আছে । ইয়াৰ উপৰি আছে পৰিকল্পনা পৰ্যায়ৰ বাবে চিকিৎসা উপাদান ।
