ৰঙাপৰা, 14 জুনঃ দেওবাৰে সাপ্তাহিক বজাৰ খোলাক লৈ উত্তপ্ত পৰিস্থিতিৰ সৃষ্টি শোণিতপুৰ জিলাৰ চাৰিদুৱাৰ আৰক্ষী চকীৰ অন্তৰ্গত লখৰাত ৷ বজাৰ খোলাক কেন্দ্ৰ কৰি স্থানীয় ৰাইজ আৰু বজাৰ কৰ্তৃপক্ষৰ মাজত সৃষ্টি হয় তীব্ৰ বাক বিতণ্ডাৰ ৷ তেজপুৰত কৰ'ণা মহামাৰীৰ ক্ৰমবৰ্ধমান স্থিতিত শংকিত হৈ পৰা ৰাইজে এই মহামাৰীৰ সংক্ৰণৰ আশংকা কৰি সাপ্তাহিক বজাৰ খোলাত বাধা প্ৰদান কৰে ৷ কিয়নো লখৰা সপ্তাহিক বজাৰত বজাৰ কৰিবলৈ আহে জিলা খনৰ ভিন্ন প্ৰান্তৰ বহু লোক ৷
উল্লেখ্য যে, যোৱা 8 জুনত ৰাজ্য চৰকাৰে কিছুমান নীতি-নিয়মৰ মাজৰে ৰাজ্যৰ হাট-বজাৰসমূহ খুলিবলৈ নিৰ্দেশনা প্ৰদান কৰিছিল ৷ সেই নিৰ্দেশনা অনুযায়ী দেওবাৰে জিলাখনৰ সৰ্ববৃহৎ লখৰা সাপ্তাহিক বজাৰলৈ আহিছিল একাংশ মহলদাৰকে ধৰি ব্যৱসায়ী ৷ কিন্তু স্থানীয় ৰাইজে বজাৰ খোলাত বাধা প্ৰদান কৰাৰ বাবে সেই স্থানত সৃষ্টি হয় এক হুলস্থুলীয়া পৰিস্থিতিৰ ৷ পৰৱৰ্তী সময়ত ঘটনাস্থীলত চাৰিদুৱাৰ ৰাজহ চক্ৰ বিষয়া উপস্থিত হৈ পৰিস্থিতি নিয়ন্ত্ৰণলৈ আনে ৷ ইয়াৰোপৰি ঘটাস্থলীত আৰক্ষী মোতায়েন কৰাৰ লগতে বজাৰখনো বন্ধ কৰি দিয়ে ৷
লগতে পঢ়কঃ বাঘজানত উপস্থিত হ'বলৈ সময় নাই মুখ্যমন্ত্ৰীৰ, লুৰিণৰ প্ৰতিক্ৰিয়া
