তেজপুৰ, 1 ডিচেম্বৰ : ‘‘মোৰ স্বামী শোণিতপুৰ জিলা সাহিত্য সভাৰ সম্পাদক আৰু এখন বিদ্যালয়ৰ কেৰাণী । দেওৰ ঠেলামৰা আৰক্ষীৰ এগৰাকী আৰক্ষী । স্বামী আৰু পৰিয়ালৰ লোকে যোৱা ছবছৰ ধৰি মোক শাৰীৰিক নিৰ্যাতন চলাই আহিছে । স্বামীয়ে নিশা মোক মাৰধৰ কৰে আৰু দিনত পৰিয়ালৰ লোকে । মোক ডিঙি চেপি হত্যাৰ চেষ্টাও চলায়’’ । এয়া এগৰাকী নিৰ্যাতিত মহিলাৰ মন্তব্য (Domestic violence case in Tezpur)।
নাৰী নিৰ্যাতনৰ ঘটনাত এইবাৰ নাম সাঙোৰ খাইছে শোণিতপুৰ জিলা সাহিত্য সভাৰ সম্পাদক দুলাল নাথৰ ৷ সাহিত্য সভাৰে জড়িত হোৱাৰ উপৰিও অভিযুক্ত নাথ পেছাত এজন কেৰাণী ৷ অভিযুক্ত নাথৰ বিৰুদ্ধে উত্থাপিত হৈছে পত্নীক শাৰীৰিক নিৰ্যাতন কৰাৰ এক গুৰুতৰ অভিযোগ (Harassment of wife by husband and his family at Thelamara) ৷ শাৰীৰিক নিৰ্যাতন সহ্য কৰিব নোৱাৰি উপায়ন্তৰ হৈ তেওঁৰ পত্নীয়ে শোণিতপুৰ আৰক্ষী অধীক্ষকৰ ওচৰত দাখিল কৰে এক এজাহাৰ ৷
অভিযোগ অনুসৰি, 14 বছৰ ধৰি সাংসাৰিক জীৱন কটোৱা ঠেলামৰাৰ দুলাল নাথ শেহতীয়াকৈ পৰকীয়া প্ৰেমত মত্ত ৷ পৰকীয়া প্ৰেমত পৰি নাথে নিজ পত্নীৰ ওপৰত কিছু দিনৰ পৰা চলাই আহিছে অকথ্য শাৰীৰিক তথা মানসিক নিৰ্যাতন ৷ এইক্ষেত্ৰত নাথৰ পৰিয়ালেও হাত উজান দিয়াৰ অভিযোগ উঠিছে ৷ নিশা হ’লে স্বামীৰ অত্যাচাৰ আৰু দিনত স্বামীৰ পৰিয়ালৰ অত্যাচাৰ ৷ ফলত উপায়ন্তৰ দুৰ্ভগীয়া মহিলাগৰাকীয়ে প্ৰাণৰ মমতাত স্বামীগৃহ ত্যাগ কৰি মাতৃগৃহত উপস্থিত হয়গৈ ৷
ইমানৰ পিছত ভুক্তভোগী মহিলাগৰাকীৰ লগতে মাতৃগৃহৰ পৰিয়ালে অত্যাচাৰী স্বামী তথা স্বামীগৃহলৈ ওভতাই পঠাব বিচৰা নাই ৷ ইয়াৰ বিপৰীতে মহিলাগৰাকীয়ে ন্যায় বিচাৰি কাষ চাপিছিল আৰক্ষীৰ ৷ কিন্তু অভিযুক্ত স্বামীৰ ভাতৃ তথা মহিলাগৰাকীৰ দেওৰ অসম আৰক্ষীত কৰ্মৰত হোৱা হেতুকে ভুক্তভোগী মহিলাগৰাকীয়ে স্থানীয় আৰক্ষী থানাত গোচৰ তৰাৰ পিছতো আৰক্ষীয়ে এই ক্ষেত্ৰত কোনো পদক্ষেপ গ্ৰহণ নকৰাৰ অভিযোগ উত্থাপিত হৈছে ৷
উপায়ন্তৰ হৈ ভুক্তভোগী মহিলাগৰাকীয়ে কাষ চাপে শোণিতপুৰ আৰক্ষী অধীক্ষকৰ ৷ লগতে অধীক্ষকগৰাকীক নিজ হাতে দিয়ে এজাহাৰ পত্ৰখন ৷ এই এজাহাৰৰ পাচতেই তাৎক্ষণিকভাৱে ঠেলামৰা থানাত ভাৰতীয় দণ্ডবিধি অনুসৰি, 498, 323/34 ৰ অধীনৰ 109/22 নঙত ৰুজু কৰা হয় এক গোচৰ ৷ এই গোচৰৰ আধাৰতে ইতিমধ্যে আৰক্ষীয়ে আৰক্ষীয়ে আৰম্ভ কৰিছে তদন্ত ৷
ইফালে, সভাই-সমিতিয়ে ডিঙিৰ শিৰ ফুলাই সমাজত উচ্চ আসন লাভ কৰা অভিযুক্ত দুলাল নাথে সমাজত কি নীতি শিক্ষা প্ৰদান কৰিব বুলিও বিভিন্নজনে এতিয়া প্ৰশ্ন উত্থাপন কৰিছে ৷ তাৰোপৰি সংবাদক্ষেত্ৰৰে জড়িত নাথে নিজৰ কুকৰ্মৰ বাবে সংবাদ শিৰোনাম দখল কৰা বিষয়টোক লৈও চৰ্চা চলিছে এতিয়া তেজপুৰ তথা ঠেলামৰাত ৷
লগতে পঢ়ক : Father sexually assaulting minor stepdaughter: ধৰ্ষণকাৰী সতিয়া পিতৃক ২০ বছৰৰ কাৰাদণ্ড
