তেজপুৰ, 14 মে': তেজপুৰত জধে মধে বৃদ্ধি পাইছে ই ৰিক্সা আৰু টেম্প'ৰ দৌৰাত্ম্য ৷ চহৰ খনৰ প্ৰত্যেকটো পথ-উপপথত এতিয়া ই ৰিক্সা আৰু টেম্প'ৰ পৰা অন্য যানবাহন চলাচল কৰাটো কঠিন হৈ পৰিছে ৷ এই সন্দৰ্ভত জিলা প্ৰশাসন অথবা মটৰ পৰিবহন বিভাগৰ কোনো হস্তক্ষেপ নোহোৱাৰ অভিযোগ ৷
উল্লেখযোগ্য যে আজিৰ পৰা তিনি বছৰৰ পূৰ্বে এই ই-ৰিক্সাৰ প্ৰভাৱ বিস্তাৰ কৰিছিল ৷ আৰু সেই সময়ত জিলা প্ৰশাসনে এই তিনিটা চকা সংযুক্ত টেম্প সমূহক এক নিৰ্ধাৰিত পৰিসৰত ৰাখিবলৈ প্ৰচেষ্টা চলাইছিল যদিও, সময়ৰ লগে লগে সিও ফুটুকাৰ ফেনত পৰিণত হয় ৷ জিলা পৰিবহন বিভাগে যোৱা দুই বছৰৰ ভিতৰত সীমাহীন এই বাহনৰ অনুজ্ঞা পত্ৰ দিয়াৰ ফলত এতিয়া সাধাৰণ লোকৰ মাজত এক অপ্ৰীতিকৰ পৰিৱেশৰ সৃষ্টি হয় ৷ ইতিমধ্যে চহৰ খনৰ অতি কম পৰিসৰৰ পথ সমূহত যানবাহন আৰক্ষীৰ কোনো নিয়ন্ত্ৰণ নথকাৰ অভিযোগ উঠিছে ৷ ফলত ৰোগীক অনা নিয়া কৰা তেজপুৰ কনকলতা অসামৰিক চিকিৎসালয়ৰপথটোৰ বাবে এক ভাবুকি কঢ়িয়াই আনিছে ৷ নিতৌ উক্ত প্ৰৱেশ পথত ই ৰিক্সা আৰু টেম্পৰ নিৰ্ধাৰিত পাৰ্কিঙৰ বাবে বন্ধ হৈ পৰে মূল প্ৰৱেশ পথ ৷ আনহাতে কোনো ধৰণৰ সীমা নথকাকৈ আজিও জিলা পৰিবহন বিভাগে এই ধৰণৰ বাহনক অনুজ্ঞা পত্ৰ দি আহিছে । ফলস্বৰূপে জৰুৰী সময়ত কোনো পথে দি পাৰ হব নোৱাৰে সাধাৰণ লোক সকলে ৷
