তেজপুৰ, 24 জুলাই : সমগ্ৰ অসমৰ লগতে বিশ্ব ঐতিহ্য কাজিৰঙা ৰাষ্ট্ৰীয় উদ্যানৰ প্ৰায় 85% অঞ্চল বানৰ কবলত। বৰ্তমানেও ৰাষ্ট্ৰীয় উদ্যানখনৰ 153 টা বন শিবিৰ জলমগ্ন হৈ আছে । অসমৰ বানৰ ফলত বৰ্তমানলৈকে 93 গৰাকী লোকৰ মৃত্যু হৈছে ৷
এনে এক জটিল ক্ষণত ডিউক অৱ কেম্ব্ৰিজ প্ৰিন্স উইলিয়ামছ আৰু পত্নী কেথেৰিনে কাজিৰঙা ৰাষ্ট্ৰীয় উদ্যানৰ ভয়াবহ বান পৰিস্থিতিৰ বুজ লয় আৰু মৃত্যু হোৱা জীৱ-জন্তুৰ প্ৰতি সমবেদনা জ্ঞাপন কৰে । কাজিৰঙা ৰাষ্ট্ৰীয় উদ্যানৰ সঞ্চালক পি. শিৱ কুমাৰলৈ প্ৰেৰণ কৰা এখন পত্ৰৰ জৰিয়তে উইলিয়ামছ আৰু তেওঁৰ সহধৰ্মিনী কেথেৰিনে কৰ'ণা সংক্ৰমণৰ মাজতে এই ভয়াৱহ বানৰ বাবে আশ্চৰ্য প্ৰকাশ কৰে ৷
উল্লেখ্য যে, প্ৰিন্স উইলিয়ামছ আৰু কেথেৰিনে 2016 চনৰ এপ্ৰিল মাহত অসম ভ্ৰমণ কৰাৰ সময়তে কাজিৰঙা ৰাষ্ট্ৰীয় উদ্যান ভ্ৰমণ কৰাৰ অভিজ্ঞতাৰ বিষয়ে পুনৰ বিশ্লেষণ কৰে । বানপানীৰ ফলত ৰাষ্ট্ৰীয় উদ্যানখনৰ বিশ্ববিখ্যাত এশিঙীয়া গঁড়ৰ লগতে অন্য জীৱ-জন্তুৰ মৃত্যু হোৱাত গভীৰ শোক প্ৰকাশ কৰে দুয়োগৰাকীয়ে ৷ কিছুদিন পূৰ্বে ইংলেণ্ডৰ প্ৰাক্তন ক্ৰিকেটাৰ কেভিন পিটাৰছনেও অসমৰ বান পৰিস্থিতিৰ বাবে সমবেদনা জ্ঞাপন কৰিছিল ৷
ৰাষ্ট্ৰীয় উদ্যানৰ শেহতীয়া তথ্য অনুসৰি, বৰ্তমানলৈকে 57 টা জীৱ-জন্তু বানৰ ফলত আঘাতপ্ৰাপ্ত হৈছে ৷ আনহাতে, 150 টা জীৱ-জন্তু উদ্ধাৰ হোৱাৰ লগতে 127 টা পুনৰ মুকলি কৰি দিয়া হৈছে ৷ মুঠ 123 টা জীৱ-জন্তুৰ মৃত্যু হোৱাৰ লগতে 7 টা চিকিৎসাধীন অৱস্থাত আছে ৷ ৰাজপথত আশ্ৰয় লৈছে গঁড়,পহু,হাতী আদি অন্যান্য জীৱ-জন্তুয়ে ।
লগতে পঢ়ক : স্বাধীনতা দিৱসৰ বাবে গৃহ মন্ত্ৰণালয়ৰ নিৰ্দেশনা জাৰি
