তেজপুৰ,২০ আগষ্ট : শেহতীয়াকৈ অৰুণাচল প্ৰদেশৰ পশু পালন বিভাগে সামাজিক মাধ্যমৰ জৰিয়তে জনসাধাৰণৰ মাজত "য়াক" সংৰক্ষণ ব্যৱস্থাৰ ওপৰত সজাগতা বৃদ্ধি কৰিছে । "য়াক" পালনৰে বহু লোক স্বাৱলম্বী হোৱা দেখা গৈছে ৷ কিন্তু, বিভিন্ন কাৰণত প্ৰদেশখনত য়াকৰ সংখ্যা বহুখিনি হ্ৰাস পোৱা দেখা গৈছে ৷ সেয়ে য়াক সংৰক্ষণৰ স্বাৰ্থত সজাগতা বৃদ্ধি কৰিছে অৰুণাচল প্ৰদেশৰ পশু পালন বিভাগে ৷
লগতে পঢ়কঃ প্ৰাক্তন আইএএছ ৰাজীৱ কুমাৰ দেশৰ নতুন মুখ্য নিৰ্বাচনী আয়ুক্ত নিযুক্ত
উল্লেখ্য যে, ডিৰাঙত ব্যক্তিগত ফাৰ্মত য়াক পালনৰ বাবে চৰকাৰ তথা বিভাগে গুৰুত্ব দিয়া দেখা গৈছে । দেশৰ অন্য প্ৰান্তৰ প্ৰজাতিৰ ভিতৰত অৰুণাচল প্ৰদেশৰ "য়াক" ৰ ভূমিকা গুৰুত্বপূৰ্ণ । ইয়াক "অৰুণাচলী য়াক ",বুলি কোৱা হয় ৷ ই -৪০℃ (চল্লিছ) উষ্ণতাত বাস কৰিব পাৰে । জম্মু কাশ্মীৰৰ পিছতে অৰুণাচল প্ৰদেশৰ য়াকৰ জনসংখ্যাত দ্বিতীয় স্থানত আছে । হিমালয়ৰ পাদদেশৰ এঢলীয়া পাহাৰত ইয়াৰ অৱস্থিতি পোৱা যায় । প্ৰায় সৰহ সংখ্যক লোকৰ মাজতে এতিয়া "য়াক", পালনৰ প্ৰচেষ্টা দেখা পোৱা গৈছে ।
পশ্চিম কামেং জিলাৰ ডিৰাঙত "য়াক"ৰ এক ৰাষ্ট্ৰীয় গৱেষণা কেন্দ্ৰ আছে । ইয়াত প্ৰায় ১৫০ টা বিভিন্ন প্ৰজাতিৰ য়াক সংৰক্ষণ কৰা হৈছে । ১৯৮৯ চনত অৰুণাচল প্ৰদেশৰ ডিৰাঙৰ ভাৰতীয় কৃষি অনুসন্ধান কেন্দ্ৰ ও গৱেষণা কেন্দ্ৰ স্থাপন হৈছিল ৷ ভাৰতবৰ্ষত মুঠ এনেকুৱা ১৭খন বিশ্ববিদ্যালয় আছে তাৰ ভিতৰত ৭খন সেউজ বিশ্ববিদ্যালয় ৷ ১০৮খন ৰাষ্ট্ৰীয় কেন্দ্ৰও আছে । তাৎপৰ্যপূৰ্ণ যে, অৰুণাচল প্ৰদেশত ৫ টা প্ৰজাতিৰ য়াক পোৱা যায় ৷ ইয়াৰ ভিতৰত এটা প্ৰজাতিয়ে ইতিমধ্যে ৰাষ্ট্ৰীয়ভাৱে স্বীকৃতি লাভ কৰা বুলি অৱগত কৰে ডিৰাঙৰ গৱেষণা কেন্দ্ৰৰ প্ৰশাসনিক বিষয়া নগীচুং কুছিলোঁয়ে ।
লগতে পঢ়কঃ প্ৰথমে আগিয়া ছোফিয়া, এইবাৰ গীৰ্জাঘৰ; বিশ্ব সংস্কৃতিৰ প্ৰতি ভাবুকি তুৰ্কীৰ ৰাষ্ট্ৰপতি
"য়াক" ৰ গাখীৰ উৎপাদন কৰি ডিৰাঙত বহুতো শিক্ষিত যুৱকে উপাৰ্জনৰ পথ সুগম কৰি তুলিছে । আনহাতে পশ্চিম অৰুণাচল প্ৰদেশৰ পশ্চিম কামেং আৰু টাৱাঙত এইবিধ জন্তু দেখিবলৈ পোৱা যায় । মনপা লোকসকলে ইয়াৰ শিং বিভিন্ন ধৰণৰ পূজাত ব্যৱহাৰ কৰে । য়াকৰ নোমৰ পৰা ঊণ তৈয়াৰ কৰা হয় ৷ লগতে পাহাৰীয়া বৰফ অঞ্চলত য়াকৰ পিঠিত বোজা কঢ়িয়াই সামগ্ৰী কঢ়িওৱা হয় । ডিৰাঙৰ সংস্থাই প্ৰতি বছৰে য়াক মেলা উদযাপন কৰে যাতে কৃষিজীৱি লোকসকলৰ মাজত সজাগতা বৃদ্ধি আৰু প্ৰসাৰ লাভ কৰে ।
অৰুণাচল প্ৰদেশ আৰু হিমালয়ৰ পাদদেশত সচৰাচৰ ঘৰচীয়া (Bos grunniens ) য়াক পোৱা যায় । আনহাতে অন্য প্ৰান্তত পোৱা য়াক'ৰ প্ৰজাতিবোৰ বনৰীয়া,যিবোৰ তিব্বত প্লেটো, উত্তৰ ম্যানমাৰ আৰু ইউনানৰ অন্যান্য অঞ্চলত দেখিবলৈ পোৱা যায় ৷ য়াকসমূহ মংগোলিয়া আৰু ছাইবেৰীয়াটো পোৱা যায় ৷ এইসমূহ য়াক হিংস্ৰ, ইয়াক Bos mutus বুলি কোৱা যায় । ঘৰচীয়া "য়াক"ৰ নেজ দীঘল আৰু ইয়াৰ নোম কিছু পৰিমাণে কম । ডিৰাঙৰ প্ৰায় ১০,০০০ ফুট উচ্চতাত থকা ফাৰ্মে গাখীৰ,মাংসৰ যোগান ধৰে ।
চৰকাৰীভাবে স্পষ্টকৈ প্ৰকাশ নকৰিলেও হয়তো মাংসৰ বাবে কিছুমান ঠাইত ব্যৱহাৰ কৰা হয় বাবে "য়াক"ৰ সংখ্যা হ্ৰাস পোৱা বুলি পশু পালন বিভাগে "য়াক" সংৰক্ষণ ব্যৱস্থাৰ ওপৰত সজাগতা বৃদ্ধি কৰিছে ।
লগতে পঢ়কঃ মহামাৰীৰ মাজতো অনুষ্ঠিত হ'ব নিৰ্বাচন, কেন্দ্ৰীয় নিৰ্বাচনী আয়োগৰ নতুন নিৰ্দেশাৱলী জাৰী
