তেজপুৰ,৩০ মাৰ্চ : হঠাৎ দেশজুৰি তলা বন্ধ ঘোষণা কৰাৰ পিচত চৌদিশে হাহাকাৰ পৰিস্থিতিৰ সৃষ্টি হৈছে ৷ বাংগালুৰুৰ হোটেলত কৰ্মৰত অসমৰ বড়ো যুৱকৰ এটা দলে ভয়তে সহায়ৰ বাবে এটা ভিডিঅ'ৰ জৰিয়তে বিভিন্ন দল সংগঠনক আহ্বান জনায় ৷ তেওঁলোকে কাম কৰি থকা হোটেলখন বন্ধ হৈ পৰা ফলত থকা-খোৱাৰ লগতে ঘৰলৈ যাবলৈও সকলো ধৰণৰ যাতায়তৰ ব্যৱস্থা বন্ধ হৈ যোৱাত অধিক বিপদৰ সন্মুখীন হৈছে যুৱককেইজন ৷
তেওঁলোকক সহায়ৰ বাবে চ'ছিয়েল মিডিয়াত বিভিন্ন জনে বড়ো যুৱকৰ দলটোক সহায় কৰিবলৈ আহ্বান জনাইছিল ৷ খবৰটো বাংগালুৰুত থকা অসমৰ বিভিন্ন দল-সংগঠনৰ দৃষ্টি গোচৰ কৰিবলৈ বিভিন্ন জনে চেষ্টা কৰিছিল আৰু ঠিক তেতিয়াই অসম এছ’চিয়েচন বাংগালুৰুৰ প্ৰণৱ জ্যোতি বৰাই ততাতৈয়াকৈ যুৱকৰ দলটোক সাক্ষাৎ কৰে ৷ তেওঁলোকৰ পৰিস্থিতিৰ বুজ লোৱাৰ উপৰিও তেওঁলোকক কৰ’ণা ভাইৰাছৰ ভয়াৱহতাৰ বিষয়ে আৰু এনে পৰিস্থিতিৰ সৈতে মোকাবিলা কৰিবলৈ বিভিন্ন ধৰণৰ উপায় অৱগত কৰায় ৷ তাৰোপৰি শংকিত হোৱা ভিডিঅ' বনাই অসমলৈ পঠিয়াই পৰিয়ালৰ লোকৰ উপৰিও বহিঃৰাজ্যত থকা যুৱক-যুৱতীক শংকিত নকৰিবলৈও আহ্বান জনায় ৷
লগতে পঢ়ক : অত্যাৱশ্যকীয় সামগ্ৰীৰ অভাৱ দূৰীকৰণৰ আশ্বাস দিলে মুখ্যমন্ত্ৰীয়ে !
