তেজপুৰ, 29 অক্টোবৰ: আমুৰ ফেলকন, এবিধ প্ৰব্ৰজনকাৰী চৰাই ৷ সুদূৰ ছাইবেৰিয়া, মংগোলীয়া আৰু চীনৰ পূব অঞ্চলৰ পৰা দক্ষিণ আফ্ৰিকালৈ পৰিভ্ৰমণ কৰে আমুৰ ফেলকনে ৷ এই যাত্ৰাপথতে উত্তৰ-পূৰ্বাঞ্চলৰ বিভিন্ন স্থানত জিৰণি লয় প্ৰব্ৰজনকাৰী পক্ষীবিধে ৷ এণ্টাৰ্কটিকাক বাদ দি পৃথিৱীৰ প্ৰায় আটাইকেইখন মহাদেশতে বিয়পি আছে ফেলকন পক্ষীৰ প্ৰায় 40 টাকৈ প্ৰজাতি ৷ অক্টোবৰ মাহৰ মাজভাগৰ পৰাই আমুৰ ফেলকনৰ জাকবোৰৰ আগমন ঘটে নাগালেণ্ড, মণিপুৰৰ লগতে অসমৰো কাৰ্বি আংলং, নগাঁও আদি ভিন্ন স্থানলৈ ৷ উত্তৰ-পূৰ্বাঞ্চলত প্ৰায় এমাহ সময় কটোৱাৰ পাচত ফেলকনৰ জাকটোৱে আৰম্ভ কৰে দক্ষিণ আফ্ৰিকামুখী যাত্ৰা ৷
অমুৰ ফেলকন এবিধ পাৰৰ দৰে চৰাই ৷ গ্ৰীষ্মকালীন প্ৰজনন পাচত প্ৰায় ২৯ হাজাৰ কিলোমিটাৰ অতিক্ৰম কৰি ভাৰতৰ ভিন্ন স্থানত প্ৰবেশ কৰে পৰিভ্ৰমী চৰাইবিধে ৷ ব্যতিক্ৰম নহ'ল এই বৰ্ষটোও ৷ প্ৰায় ২৯ হাজাৰ কিলোমিটাৰ পথ অতিক্ৰম কৰি মণিপুৰত উপস্থিত হ'ল ফেলকন ৷ কেন্দ্ৰীয় পৰিৱেশ মন্ত্ৰণালয়ে টুইটাৰযোগে আদৰণি জনালে পৰিভ্ৰমী চৰাইৰ জাকটোক ৷ 2019 চনত মণিপুৰৰ টামেঙলং জিলাৰ বন বিভাগে ভাৰতীয় বন্যপ্ৰাণী প্ৰতিষ্ঠানৰ সহযোগিতাত ৰেডিঅ' কলাৰ লগাই উৰাই দিছিল 5 টাকৈ ফেলকনক ৷ তাৰ ভিতৰত দুটা চৰাই এইবেলিও পুনৰ আহি উপস্থিত হৈছেহি মণিপুৰৰ পুচিং গাঁৱত ৷ উল্লেখ্য যে, বন বিভাগ আৰু পক্ষী গৱেষক সকলৰ মতে, ৰেডিঅ' কলাৰে এই পক্ষীসমূহৰ গতি-বিধি লক্ষ্য কৰাৰ লগতে তেওঁলোকৰ সুৰক্ষাৰ দিশটোত যথেষ্ট গুৰুত্ব প্ৰদান কৰে ৷ 5 খন গাঁৱৰ নামেৰে পুচিং, ইৰাং, বাৰাক, ফালং, ছিউলং নামেৰে নামাকৰণ কৰা হৈছিল ৰেডিঅ' কলাৰ লগাই উৰাই দিয়া চৰাইকেইটাক ৷ ৰেডিঅ' ট্ৰান্সমিটাৰ লগোৱাৰ পাচতে দক্ষিণ আফ্ৰিকালৈ উৰি যোৱাৰ সময়ত সংযোগ বিচ্ছিন্ন হৈ পৰিছিল দুটা ফেলকনৰ ৷ কিন্তু তাৰ মাজতে দুটাকৈ ফেলকন পুনৰ মণিপুৰলৈ ঘূৰি অহাত সুখ প্ৰকাশ কৰিছে বিভাগীয় কৰ্তৃপক্ষই ৷
উল্লেখ্য যে, আমুৰ ফেলকনৰ ওজন সাধাৰণতে ১৭০ গ্ৰাম হয় যদিও, উত্তৰ পূৰ্বাঞ্চললৈ আহি দক্ষিণ আফ্ৰিকালৈ উভতি যোৱাৰ সময়ত ওজন হয়গৈ প্ৰায় ২৭০ গ্ৰাম পর্যন্ত ৷ পৰিভ্ৰমী চৰাইবিধ পূৰ্বে মণিপুৰ আৰু নাগালেণ্ডত বহু লোকৰ চিকাৰৰ বলি হৈছিল যদিও, সম্প্ৰতি ইয়াৰ বিৰুদ্ধে সজাগতা সৃষ্টিৰ বাবে স্থানীয় ৰাইজৰ সহযোগত বন বিভাগে ভিন্ন পদক্ষেপ গ্ৰহণ কৰিছে ৷ টামেঙলং জিলাত পুচিং গাঁওৰ লোকে বন বিভাগৰ সহযোগিতাত সেই পৰিভ্ৰমী চৰাই যাতে চোৰাং চিকাৰী হাতত নপৰে তাৰ বাবে গাঁৱত ভিন্ন ব্যৱস্থা গ্ৰহণ কৰিছে ৷ শীতৰ আগমনৰ লগে লগে আমুৰ শেনৰ উপস্থিতিয়ে উত্তৰ-পূৰ্বাঞ্চলৰ জৈৱ বৈচিত্ৰৰ তালিকাখন সমৃদ্ধ কৰিছে ৷ যিয়ে দেশী-বিদেশী পৰ্যটককো আকর্ষণ কৰাৰ বহু থল আছে ৷
