তেজপুৰ, 3 ছেপ্তেম্বৰঃ চাহ শ্ৰমিকৰ মজুৰিক লৈ ৰাজনীতি খেলা বিজেপি চৰকাৰৰ বিৰুদ্ধে তীব্ৰ প্ৰতিবাদ সাব্যস্ত কৰে সদৌ অসম অদিবাসী ছাত্ৰ সন্থাই ৷ শেহতীয়াকৈ বিভিন্ন কোম্পানীসমূহে চাহ শ্ৰমিকক 20% বোনাছ দিব পৰা নাযাব বুলি কৰা ঘোষণাৰ পিচতে শোণিতপুৰ জিলাত প্ৰতিবাদ কৰে ছাত্ৰ সংগঠনটোৱে ৷ মঙলবাৰে শোণিতপুৰ জিলা সমিতিয়ে এইদৰে প্ৰতিবাদ সাব্যস্ত কৰাৰ লগতে জিলা উপায়ুক্তৰ জৰিয়তে মুখ্যমন্ত্ৰীলৈ স্মাৰকপত্ৰ প্ৰেৰণ কৰে ৷
শোণিতপুৰ আছাৰ নেতা মেলখাচ টপ্পই নিজৰ প্ৰতিক্ৰিয়া প্ৰকাশ কৰি কয় যে, "কোম্পানীসমূহে বেলেন্সশ্বীট প্ৰকাশ নকৰাকৈ সংবাদমেল অনুষ্ঠিত কৰি শ্ৰমিকৰ মজুৰিত 20% বোনাচ দিব পৰা নাযাব বুলি কৈছে ৷ মালিকগোষ্ঠীৰ সহায় হোৱাকৈ চৰকাৰে গ্ৰহণ কৰা এই সিদ্ধান্ত একমাত্ৰ ৰাজনৈতিক মুনাফা আদায়ৰ সৈতে জড়িত হৈ আছে ৷ নিৰ্বাচনৰ পূৰ্বে চাহ শ্ৰমিকসকলক এন্ড্ৰইড ফোনৰ লগতে অন্যান্য বিভিন্ন ঘোষণা কৰিছিল বিজেপি চৰকাৰে ৷ কিন্তু নিৰ্বাচন হৈ যোৱাৰ পিচতেই নীৰৱতা অৱলম্বন কৰিছে চৰকাৰে ৷ চৰকাৰে মজুৰি চুক্তিৰ আধাৰত শ্ৰমিকক এইদৰে বঞ্চিত কৰি পেটে-ভাতে মাৰিব খোজা ষড়যন্ত্ৰক তীব্ৰ গৰিহণা প্ৰদান কৰিছো ৷"
আনহাতে শোণিতপুৰ আছাৰ আন এগৰাকী শীৰ্ষনেতা জইদিপলাং টপ্পই টীয়কত সংঘটিত হোৱা ডাক্তৰ হত্যাকাণ্ডৰ সৈতে জড়িত থকা ব্যক্তিক চৰকাৰে শীঘ্ৰেই উচিত শাস্তি প্ৰদান কৰিব লাগে বুলি কয় ৷ বাগিছাৰ শ্ৰমিকসকলৰ মাজত অন্যান্য সুবিধাৰ লগতে উপযুক্ত শিক্ষাৰ অভাৱত এনেকুৱা ঘটনা সংঘটিত হৈছে ৷ তেওঁ লগতে কয় যে, চৰকাৰে এনেকুৱা ঘটনা প্ৰতিহত কৰিবলৈ বাগিছাসমূহত শিক্ষাৰ লগতে অন্যান্য সুবিধাসমূহ প্ৰদান কৰিব লাগে ৷
