তেজপুৰ, ১৩ জুলাই : বৃহস্পতিবাৰে প্ৰধানমন্ত্ৰী আৱাস যোজনা- গ্ৰামীণ (পিএমএৱাই-জি) অন্তৰ্গত ৩ লাখ বাসগৃহ উদ্বোধন কৰা হয় সমগ্ৰ ৰাজ্যত ৷ ইয়াৰ অংশ হিচাবে শোণিতপুৰৰ ৰঙাপাৰা উন্নয়ন খণ্ডতো কেইবা হাজাৰো বাসগৃহ উদ্বোধনৰ কাৰ্যসূচী আৰম্ভ কৰা হয় ৷ ৰঙাপাৰাৰ অন্তৰ্গত বৰজুলি ৩ নং গাঁও পঞ্চায়তত পিএমএৱাই-জি ঘৰৰ গৃহপ্ৰৱেশ অনুষ্ঠানত অংশগ্ৰহণ কৰে শোণিতপুৰ জিলাৰ আয়ুক্ত দেৱ কুমাৰ মিশ্ৰই ।
সমগ্ৰ ৰাজ্যৰ সমান্তৰালকৈ শোণিতপুৰ জিলাতো গৃহপ্ৰৱেশ অনুষ্ঠানৰ অংশ হিচাবে মুঠ ৬৪৭৫ টা সম্পূৰ্ণ PMAY-G উদ্বোধন কৰা হয় । উন্নয়ন খণ্ড অনুসৰি জিলাখনত উদ্বোধন কৰা এনে বাসগৃহৰ সংখ্যা এনেধৰণৰ- বালিপাৰা উন্নয়ন খণ্ডত ১২৮১ টা, বিহগুৰি উন্নয়ন খণ্ডত ৫৩০ টা, বৰছলা উন্নয়ন খণ্ডত ১৪৭৪ টা, ঢেকীয়াজুলি উন্নয়ন খণ্ডত ১৫১২ টা, গাভৰু উন্নয়ন খণ্ডত ১৪৩১ টা, ন-দুৱাৰ উন্নয়ন খণ্ডত ১৭৩ টা আৰু ৰঙাপাৰা উন্নয়ন খণ্ডত ৭৪ টা ৷
উল্লেখ্য যে, বৃহস্পতিবাৰে সমগ্ৰ শোণিতপুৰ জিলাৰ কেইবাটাও প্ৰান্তত একেধৰণৰ কেইবাটাও গৃহ প্ৰৱেশ কাৰ্যসূচী অনুষ্ঠিত কৰা হয় ৷ এই অনুষ্ঠানসমূহত মন্ত্ৰী অশোক সিংহল, সাংসদ পল্লৱ লোচন দাস, স্থানীয় বিধায়কসকল, অধ্যক্ষ জেড পি চি, চি ই অ', জিলা পৰিষদৰ মুখ্য কাৰ্যবাহী বিষয়া কৰবী শইকীয়াকে আদি কৰি জিলাখনৰ কেইবাগৰাকী শীৰ্ষ বিষয়া উপস্থিত থাকে ৷
স্মৰ্তব্য যে, প্রধানমন্ত্ৰী আৱাস যোজনাৰ (গ্রামীণ) অধীনত বৃহস্পতিবাৰে ৰাজ্যৰ ৩,০৭,৮১৪টা পৰিয়ালে একেলগে গৃহ প্ৰৱেশ কৰে । গৃহ প্ৰৱেশৰ এই বৃহৎ কাৰ্যসূচীৰ বাবে বৃহস্পতিবাৰে পঞ্চায়ত আৰু গ্ৰামোন্নয়ন বিভাগৰ উদ্যোগত গুৱাহাটীৰ শ্ৰীমন্ত শংকৰদেৱ কলাক্ষেত্ৰত কেন্দ্ৰীয়ভাৱে বিশেষ অনুষ্ঠানৰ আয়োজন কৰা হয় । ইতিমধ্যে ৰাজ্যখনত আৱণ্টিত ১৯,১০,৮২৩টা ঘৰৰ ভিতৰত ১২,৪৩,৫৮৪টা ঘৰ নিৰ্মাণ সম্পূৰ্ণ হৈছে ।
লগতে পঢ়ক: PM Awas Yojana: প্রধানমন্ত্ৰী আৱাস যোজনাৰ অধীনত ৰাজ্যৰ তিনি লক্ষাধিক লোকৰ গৃহ প্ৰৱেশ
