শিৱসাগৰ, 28 আগষ্ট: ববিতা ভৰালী ফেচবুক পোষ্ট আৰু এঘৰীয়া বিতৰ্কই শেহতীয়াকৈ অন্য এক মোৰ লোৱা দেখা গৈছে ৷ ভৰালীৰ পৰিয়ালক এঘৰীয়া কৰাৰ কথা অস্বীকাৰ কৰিছে গঞাই ৷ "দোষীৰ ক্ষমাহে ভূষণ ৷ আমি তেওঁক সেৱা এভাগ কৰি ক্ষমা খুজিবলৈ দিছিলো ৷ তেওঁ সেইটো নকৰিলে ৷ তেওঁক চাগে ৰাইজ নালাগে ৷ তেওঁতকৈ সমাজখন উৰ্ধ্বৰ নহয় ৷ আমি তেওঁক এঘৰীয়া কৰা নাছিলো, এয়া মিছা অভিযোগ। আমি তেওঁলোকৰ ঘৰৰ যিকোনো মাংগলিক অনুষ্ঠানত ভাগ নলওঁ বুলিহে সিদ্ধান্ত গ্ৰহণ কৰিছিলো ৷" শনিবাৰে অৰ্জুনগুৰিৰ নামঘৰত এখন আলোচনা অনুষ্ঠিত কৰাৰ পিছত সংবাদ মাধ্যমৰ আগত এই ভাষ্য আগবঢ়ায় গাঁওবাসীৰ জেষ্ঠ্য নাগৰিকসকলে (Villagers denied woman expelled from society) ।
গাওঁখনৰ সন্দৰ্ভত কেতবোৰ মিছা কথা সামাজিক মাধ্যমত লিখি ববীতা ভৰালীয়ে প্ৰচাৰ কৰা বুলিও প্ৰতিক্ৰিয়া প্ৰকাশ কৰিছিল ৰাইজে (Babita Bharali Facebook post)।
ৰাজ্যজুৰি জাতি-ভেদ প্ৰথা দূৰ কৰি সকলোকে একতাৰ এনাজৰীৰে বান্ধিব খোজা শংকৰদেৱৰ কথা আমি মুখেৰে কওঁ ঠিকেই ৷ কিন্তু বহু ক্ষেত্ৰত আজি দেখা গৈছে তাৰ ওলোটা ছবি ৷ জাত-পাতৰ নামত, জীৱ-জন্তু পোহাৰ নামত মানুহক এঘৰীয়া কৰা কাৰ্যই সমাজৰ উৎকৰ্ষ সাধনৰ পৰিৱৰ্তে একতাৰ এনাজৰীডাল যেন ছিঙিবহে খুজিছে ৷ এঘৰীয়া প্ৰথাটোক এঘৰীয়া কৰিব নোৱাৰিলে সমাজলৈ যে বৃহৎ প্ৰত্যাহ্বান আৰু বিপদ নামি আহিব সেয়া ধুৰূপ ৷
যোৱা ১০ আগষ্টত মঙলদৈত জাতি-ভেদৰ নামত ঘটি যোৱা হৃদয় বিদাৰক ঘটনাটোৰ সন্দৰ্ভত ১২ আগষ্টত এটা ফেচবুক পোষ্ট দিছিল ববিতাই ভৰালী নামৰ এগৰাকী মহিলাই ৷ "জাত পাত আৰু উপাধিতকৈ মানৱীয়তাতকৈ উৰ্ধ্বত ৷ জাত পাত মানৱীয়তাতকৈ ডাঙৰ হ’ব নোৱাৰে ৷ মানুহবোৰ হেৰাই গৈ আছে আৰু উপাধিবোৰ ৰৈ গৈছে ৷" বুলি লিখি কিছু মনৰ কথা সামাজিক মাধ্যমত বিবৰি লিখিছিল ববিতাই (Babita Bharali Facebook controversy) ।
ইয়াৰ পিছতে গাঁৱৰ লোকে ২১ আগষ্ট দিনা মহিলা গৰাকীক তেওঁ স্বামী আৰু সন্তানসহ এঘৰীয়া কৰে । মহিলাগৰাকীয়ে হাত যোৰ কৰি সোধাত ফেচবুক পোষ্টটোৱে দুজনমান লোকৰ মনত আঘাত দিয়া বুলি জনাই তেওঁক ৷ পৰৱৰ্তী সময়ত ববিতা ভৰালী, তেওঁৰ স্বামী আৰু সতি-সন্ততিক সমাজত অসহযোগ কৰাৰ সন্দৰ্ভত ববিতা ভৰালীয়ে অৰ্জুনগুৰি গাঁৱৰ গাওঁবুঢ়া আৰু নামঘৰৰ সভাপতিক উচিত বিচাৰৰ আবেদন কৰি এক পত্ৰ প্ৰেৰণ কৰিছিল ৷
গাঁওবুঢ়াই উক্ত পত্ৰ লাভ কৰিছিল বুলি স্বীকাৰ কৰিছে যদিও উক্ত বিষয়ত কোনো ব্যৱস্থা গ্ৰহণ নকৰিলে বুলি মন্তব্য কৰে। আনহাতে নামঘৰৰ সভাপতিয়ে তেনে কাগজ নাই দিয়া বুলি বিষয়টো নসাৎ কৰে । অৱশ্যে অনাগত দিনত ববীতা ভৰালী সমাজ তথা ৰাইজৰ লগ হ'বলৈ আহিলে সেৱা পৰৱৰ্তী সময়ত ৰাইজে সিদ্ধান্ত ল'ব বুলি জানিবলৈ দিয়ে ৷
