শিৱসাগৰ,7 জুলাই : শিৱসাগৰত মঙলবাৰে নিশা ভুৱা মাইক্ৰ’ ফাইনেঞ্চ কোম্পানী (Micro Finance Company)ৰ দুই বিষয়াক আটক কৰে আৰক্ষীয়ে ৷ শলগুৰি অঞ্চলত ‘এনাজৰী’ (Anajori) নামৰ এক মাইক্ৰ’ ফাইনেঞ্চ কোম্পানীয়ে পুৰুষ-মহিলা উভয়কে নিৰ্দিষ্ট আঁচনিৰ ভিত্তিত সহজ ঋণ প্ৰদানৰ আশ্বাস দিয়ে । ইয়াৰ বাবে 10-12 জনীয়া গোট গঠন কৰি বেংকৰ একাউণ্ট খোলা, ঋণন আৱণ্টনৰ কাম আদিৰ বাবে গোটৰ প্ৰতিজন সদস্যৰ পৰা 100 টকাকৈ সংগ্ৰহ কৰে ভুৱা কোম্পানীটোৱে । এক নিশ্চিত সংস্থাপনৰ আশাত উক্ত অঞ্চলৰ গোট খোলা সদস্যসকলে 1000 টকাকৈ ‘এনাজৰী’ৰ কৰ্মচাৰীক প্ৰদান কৰে ।
কোম্পানীটোৱে উক্ত অঞ্চলৰ পৰা প্ৰায় 2 লাখ টকা সংগ্ৰহ কৰে যদিও ঋণ প্ৰদান কৰিব নোৱাৰাত ৰাইজৰ মনত সন্দেহ উপজে ৷ ইয়াৰ পাচতে ৰাইজে আৰক্ষীৰ কাষ চাপে আৰু আৰক্ষীৰ তদন্তৰ ভিত্তিত কোম্পানীটোৰ দুই বিষয়া ক্ৰমে- নিতু গগৈ আৰু ৰাহুল লাহনক আটক কৰা হয় ৷ এইদৰে মাইক্ৰ’ ফাইনেঞ্চৰ নামত ৰাইজৰ ধন লুট কৰি অহা ভুৱা কোম্পানীৰ দুই বিষয়াক ইতিমধ্যে কাৰাগাৰলৈ প্ৰেৰণ কৰাৰ প্ৰস্তুতি সম্পূৰ্ণ কৰিছে আৰক্ষীয়ে । অৱশ্যে ভুৱা কোম্পানীটোৰ বিষয়া কাৰাগাৰলৈ গ’লেও যে ৰাইজে গাঁঠিৰ ধন ঘূৰাই নাপায় সেই কথা নিশ্চিত হৈ পৰিছে ৷
যিসময়ত মাইক্ৰ’ ফাইনাঞ্চৰ ঋণ মাফ কৰাৰ দাবীত সমগ্ৰ অসমত এক বিতৰ্ক চলি আছে, সেই সময়তে নিত্য নতুন ফাইনেঞ্চ কোম্পানীয়ে লুণ্ঠনৰ জাল মেলা পৰিলক্ষিত হৈছে ।
এনেধৰণৰ ফাইনেঞ্চ কোম্পানীৰ সৰহ সংখ্যক অবৈধ আৰু ভুৱা হোৱা কোম্পানী হোৱাৰ বাবে ৰাইজৰ মাজত সৃষ্টি হৈছে তীব্ৰ আতংকৰ । কিয়নো এনে ভুৱা কোম্পানীয়ে সহজ ঋণৰ প্ৰলোভন দি ৰাইজৰ পৰা লুটিছে লক্ষাধিক টকা ।
লগতে পঢ়ক : দুৰ্নীতিৰ অভিযোগ লাভৰ পাছতে বিভাগীয় তদন্তৰ ঘোষণা মন্ত্ৰী যোগেন মহনৰ
