শিৱসাগৰ, 29 মে’: ড্ৰাগছ, অবৈধ মদ, গাঞ্জা আদিক লৈ শূণ্য সহনশীল নীতি গ্ৰহণ কৰিছে শিৱসাগৰ আৰক্ষী-প্ৰশাসনে । ইতিমধ্যে নিচাযুক্ত সামগ্ৰীৰ সেৱন আৰু সৰবৰাহৰ বিৰুদ্ধে কঠোৰ হৈ পৰিছে শিৱসাগৰ আৰক্ষী ।
বিশেষকৈ বৰবিহ ড্ৰাগছৰ বিৰুদ্ধে জিলাখনৰ বিভিন্ন প্ৰান্তত বিগত কিছুদিনৰ পৰা আৰক্ষীয়ে অভিযান চলাই শনিবাৰে পুৱা ৫৮টা কন্টেইনাৰত প্ৰায় ১৫০ গ্ৰাম ব্ৰাউন চুগাৰ উদ্ধাৰ কৰাৰ লগতে দুজনক গ্ৰেপ্তাৰ কৰিছে । ঘটনা সন্দৰ্ভত শিৱসাগৰ আৰক্ষীয়ে শিৱসাগৰ সদৰ থানাত ৬৬৭/২০২১ নম্বৰৰ এক গোচৰ ৰুজু কৰি এনডিপিএছ আইনৰ ধাৰা ২২/২৯ৰ অধীনত ঘটনাৰ তদন্ত কৰি আন দুজন লোককো গ্ৰেপ্তাৰ কৰিছে ৷
উল্লেখ্য যে, বিগত দিনত শিৱসাগৰ আৰক্ষীয়ে চোৰাং আৰু অবৈধ মদ,গাঞ্জা আৰু ড্ৰাগছৰ বিৰুদ্ধে অভিযান চলাই বহু নিচাযুক্ত সামগ্ৰীৰ লগতে সৰবৰাহ কৰা ব্যক্তিক আটক কৰিবলৈ সক্ষম হৈছে । শনিবাৰেও জয়সাগৰ আৰক্ষীয়ে অভিযান চলাই কেইবা শ লিটাৰ অবৈধ মদ জব্দ কৰিবলৈ সক্ষম হয় । শিৱসাগৰ জিলাৰ আৰক্ষী অধীক্ষক ৰাকেশ ৰৌশনে এনে সমূহ অপৰাধ আৰু অপৰাধীৰ বিৰুদ্ধে অতি কঠোৰ হ'ব বুলি ঘোষণা কৰি অপৰাধ দূৰ কৰাৰ বাবে ৰাইজক সহযোগিতা আগবঢ়াবলৈ আহবান জনাইছে ।
