শিৱসাগৰ , 6 এপ্ৰিল : বিগত কুৰি বছৰে নিৰ্মাণ নোহোৱা এটা পথ নিৰ্মাণৰ বাবে চৰকাৰৰ সুমতি বিচাৰি শনিবাৰে ভগৱানৰ চৰণত প্ৰাৰ্থনা জনালে শিৱসাগৰৰ বৰপাত্ৰ আলীবাসীয়ে ৷ 34 খন গাঁও সংযোগী এই বিধ্বস্ত পথটো নিৰ্মাণ কৰাৰ বাবে চৰকাৰে পদক্ষেপ গ্ৰহণ নকৰাৰ অভিযোগ ৷
শিৱসাগৰ নগৰ সংযোগী এই গুৰুত্বপূৰ্ণ পথটোৰ মাজত সৃষ্টি হৈছে বৃহৎ গাঁত ৷ ইপিনে পথটোৰ দুৰৱস্থাৰ বাবে বিগত দিনত বহু দুৰ্ঘটনা সংঘটিত হৈছে বুলি জনাই গাঁওবাসীয়ে ৷ তদুপৰি পথটোৰ মাজেৰে পাৰ হৈ যোৱা ৰে’ল লাইনটোত লেভেল ক্ৰচিং নাই বুলিও অভিযোগ গাঁওবাসীৰ ৷ ৰাইজৰ অভিযোগ অনুসৰি 1998 চনৰ পৰা পথটো নিৰ্মাণৰ বাবে ৰাইজে আবেদন কৰি আহিছে যদিও চৰকাৰে এই ক্ষেত্ৰত কোনো পদক্ষেপ গ্ৰহণ কৰা নাই ৷ ইয়াৰোপৰি উন্মুক্ত ৰে’ল লাইন সন্দৰ্ভত ৰেলমন্ত্ৰী ৰাজেন গোহাঁইক ৰাইজে আৱেদন কৰিও কোনো ফল নধৰাৰ অভিযোগ ৰাইজৰ । অৱশেষত উপায়ন্তৰ হৈ ৰাইজ শৰণাপন্ন হ'ল ভগৱানৰ চৰণত ৷ পথৰ ওপৰত ৰাইজে অনুষ্ঠিত কৰিলে নাম-কীৰ্ত্তন । ভগৱানৰ ওচৰত ৰাইজৰ এয়ে প্ৰাৰ্থনা যে পথটোৰ প্ৰতি সদয় হওঁক গড়কাপ্তানী বিভাগ ৷ যদি ইমানটো চৰকাৰ সদয় নহয় তেন্তে নিৰ্বাচন বৰ্জন কৰাৰ হুংকাৰ দিয়ে ৰাইজে ।
