আমগুৰি, 14 ডিচেম্বৰ: 2021 ৰ বিধানসভা নিৰ্বাচনৰ পূৰ্বে ৰাজ্যৰ ৰাজনৈতিক ক্ষেত্ৰখনত এতিয়া সাধাৰণ লোকৰ লগতে বিভিন্ন ৰাজনৈতিক দলত শিল্পী, কলা-কুশলীৰ যোগদানৰ দৃশ্য অতি সুলভ হৈ পৰিছে ৷ নিজ নিজ দলৰ সাংগঠনিক ভেটি সুদৃঢ় কৰাৰ উদ্দেশ্যে প্ৰত্যেক ৰাজনৈতিক দলেই নিজ দললৈ শিল্পী তথা কলা-কুশলীক আদৰি অনা পৰিলক্ষিত হৈছে ৷
দেওবাৰে ৰাজ্যৰ CAA বিৰোধী আন্দোলনত এক সবল ভূমিকা পালন কৰা শিল্পী মনোজ বড়াই আনুষ্ঠানিকভাৱে অসম গণ পৰিষদত যোগদান কৰে ৷ শিল্পী মনোজ বড়াই আমগুৰিৰ খনামুখত অনুস্থিত হোৱা অগপ(অসম গণ পৰিষদ)ৰ এক মত বিনিময় অনুষ্ঠানত দলত যোগদান কৰে ৷
অগপত যোগদান কৰাৰ পাছতে সাংবাদিকৰ সন্মুখত বড়াই একাংশই নিজ ৰাজনৈতিক স্বাৰ্থ সিদ্ধিৰ বাবে কা আন্দোলনত জপিয়াই পৰা বুলি কটাক্ষ কৰে ৷ আন্দোলনৰ পাছতে ৰাজ্যৰ ৰাজনীতিত এটা নহয় দুটাকৈ নতুন আঞ্চলিক ৰাজনৈতিক দলৰ উত্থান হোৱাক লৈ কটাক্ষ কৰি বড়াই কয় যে কেৱল নেতা হোৱাৰ বাবেই এইসকল লোকে আন্দোলনত অংশ লৈছিল ৷
অগপৰ মজিয়াত থাকিলেও কা (নাগৰিকত্ব সংশোধনী আইন) ৰ বিৰুদ্ধে পূৰ্বৰ স্থিতিত তেওঁ অটল থাকিব বুলি মন্তব্য কৰি বড়াই লগতে কয় যে অগপ দলে এই আইনক ক্ষেত্ৰত এক সঠিক সিদ্ধান্ত ল'ব বুলি তেওঁৰ দৃঢ় বিশ্বাস আছে ৷
লগতে পঢ়ক:আমগুৰিত অসম ছাত্ৰ পৰিষদৰ ২০২০-২১ বৰ্ষৰ সভাপতি পদৰ নিৰ্বাচন
