শিৱসাগৰ,16 জানুৱাৰীঃ উদুলি মুদুলি ৰংঘৰৰ বাকৰি ৷ পহিলা মাঘৰ দিনা টাই আহোম যুৱ পৰিষদৰ উদ্যোগত ৰংঘৰ বাকৰিত অনুষ্ঠিত হৈছে ৰংপুৰ মেলা ৷ মাঘ মাহৰ ৰংপুৰ মেলা উপলক্ষে অনুষ্ঠিত হৈছে বিভিন্ন বৰ্ণিল কাৰ্যসূচী ৷ কেৱল সাংস্কৃতিক কাৰ্যসূচীয়েই নহয় ছাত্ৰ ছাত্ৰীৰ মাজত আয়োজন কৰা হয় চিত্ৰাংকন,ৰচী টনা,পিছল খুটা বগুৱা আদিকে ধৰি ভালেমান কাৰ্যসূচীৰ ।
পুৱাৰ পৰা পতাকা উত্তোলন,মৈদাম তৰ্পণ অনুষ্ঠানৰ পাছত ৰংপুৰ মেলা আনুষ্ঠানিক ভাৱে উদ্ধোধন কৰে পৰিষদৰ শিৱসাগৰ জিলা সমিতিৰ সভাপতি দিগন্ত তামুলীয়ে। দিগন্ত তামুলীয়ে নিজৰ ভাষণত প্ৰাচীন ৰংপুৰৰ ঐতিহ্য,সমন্বয় আৰু সম্প্ৰীতিৰ বান্ধোন শক্তিশালী কৰাৰ বাবে বিগত ১০ বছৰ ধৰি ৰংপুৰ মেলাৰ আয়োজন কৰি অহা হৈছে বুলি প্ৰকাশ কৰে। অনুষ্ঠানৰ মাজতে দিগন্ত তামুলীয়ে জাতিধ্বংসী সংশোধিত নাগৰিকত্ব আইন বাতিল কৰাৰ দাবী উত্থাপন কৰি আগন্তুক নিৰ্বাচনত শাসকীয় বিজেপি দলক যোগ্য প্ৰত্যুত্তৰ দিবলৈ আহ্বান জনায় ৰাইজক।
ৰংপুৰ মেলা উপলক্ষে প্ৰকাশ পোৱা স্মৃতি গ্ৰন্থ "চে মুন" উন্মোচন কৰে শিৱসাগৰ জিলা সাহিত্য সভাৰ সভাপতি দিলীপ বুঢ়াগোহাঁয়ে। উল্লেখ্য যে টাই আহোম যুৱ পৰিষদে ২০১১ বৰ্ষৰ পৰা ধাৰাবাহিকভাৱে ৰংঘৰ বাকৰিত ৰংপুৰ মেলাৰ আয়োজন কৰি আহিছে ৷ ন্যায়ালয়ৰ নিষেধাজ্ঞাৰ পৰিপেক্ষিতত বৃহস্পতিবাৰে ৰংঘৰৰ বাকৰিত পৰম্পৰাগত ম'হ যুজঁ অনুষ্ঠিত নহ'ল যদিও পৰিলক্ষিত হ'ল ব্যাপক জন সমাগম ৷
লগতে পঢ়কঃউত্তৰ প্ৰদেশৰ পিছত এইবাৰ হাৰিয়ানাত কৰ মুক্ত হ'ল তানহাজী
