শিৱসাগৰ,১৬ মে': ডিমৌত এটিএম লুট কাণ্ডৰ সৈতে জড়িত দুই চোৰক বুধবাৰে গ্ৰেপ্তাৰ কৰে ডিমৌ আৰক্ষীয়ে। চোৰ দুটা হৈছে ক্ৰমে,তাৰিফুল আলি আৰু চানাতুল্লা আলি। ইতিমধ্যে,চোৰ দুটাৰ ঘৰ হাজোত বুলি জানিব পৰা গৈছে। এক বিশেষ সূত্ৰৰ পম খেদি শিৱসাগৰ আৰু ডিমৌ আৰক্ষীয়ে চোৰ দুটাক কৰায়ত্ব কৰে আৰু চোৰ দুটাৰ পৰা এটা গেছ ভৰ্তি চিলিণ্ডাৰ আৰু গেছ কাটাৰ জব্দ কৰিবলৈ সক্ষম হয় কিন্তু বৰ্তমানলৈকে আৰক্ষীয়ে চোৰ দুটাৰ পৰা লুট কৰা নগদ ধন উদ্ধাৰ কৰিবলৈ সক্ষম হোৱা নাই।
উল্লেখযোগ্য যে,৮ মে'ত ডিমৌৰ কেন্দ্ৰীয় বজাৰৰ সমীপৰ এছবিআইৰ এটিএম ভাঙি চোৰে লুটি নিছিল ৮ লাখ ৮৭ হাজাৰ ৯০০ টকা। ইপিনে দুই চোৰে গেছ কাটাৰ লৈ এটিএমটো কাটি নগদ ধন লুট কৰি লৈ যোৱাৰ সমগ্ৰ দৃশ্য বন্দী হৈছিল চিচি টিভিৰ কেমেৰাত। এই ঘটনাৰ লগত আৰু চাৰিটা চোৰ জড়িত আছিল বুলি চোৰ দুটাই আৰক্ষীৰ সন্মুখত উল্লেখ কৰে। শিৱসাগৰ জিলা আৰক্ষীয়ে অধীক্ষক বলীন দেউৰীক জানিবলৈ দিয়া মতে,শীঘ্ৰে বাকীকেইটা চোৰো আৰক্ষীৰ জালত পৰাৰ সম্ভাৱনা আছে। লগতে ডিমৌত শেহতীয়াকৈ চোৰৰ তাণ্ডৱ বৃদ্ধি হোৱাত উদ্বেগ প্ৰকাশ কৰে থাওৰা সমষ্টিৰ বিধায়ক কুশল দুৱৰীয়ে।
