শিৱসাগৰ,২৫ আগষ্ট : অসম ৰাজ্যিক পৰিবহণ নিগমৰ আচৰিত কাণ্ড । প্ৰথমে সাক্ষাৎকাৰ লৈ নিযুক্তি প্ৰদান আৰু তাৰ পাছত কোনো কাৰণ নোহোৱাকৈ কামৰ পৰা অব্যাহতি ঠিকাভিত্তিক কৰ্মচাৰীক (ASTC Contractual Employee relieved)। অসম ৰাজ্যিক পৰিবহণ নিগমৰ এই কাৰ্যত ক্ষোভিত কৰ্মচাৰীসকল । এই ঘটনাক লৈ উত্তাল শিৱসাগৰৰ অসম ৰাজ্যিক পৰিবহণ নিগমৰ কাৰ্যালয় ।
জানিব পৰা মতে চলিত বৰ্ষৰ ৭ জানুৱাৰীত পৰিবহণ নিগমৰ বাছসমূহৰ বাবে নিযুক্তি দিয়া হৈছিল ৩৭ গৰাকী সহায়ক তথা চাফাই কৰ্মচাৰীক । সম্পূৰ্ণ নীতি-নিয়মৰ মাজেৰে সাক্ষাৎকাৰ অনুষ্ঠিত কৰি নিযুক্তি দিয়া হৈছিল ঠিকাভিত্তিক কৰ্মচাৰীসকলক । কিন্তু এবছৰ নহওতেই গুৱাহাটীস্থিত পৰিচালন সঞ্চালকে এক নিৰ্দেশনা যোগে ঠিকাভিত্তিক কৰ্মচাৰীসকলক ছাটাই কৰাৰ নিৰ্দেশ দিয়ে । সেই নিৰ্দেশনা অনুসৰি কোনো স্পষ্ট কাৰণ উল্লেখ নকৰাকৈয়ে কামৰ পৰা অব্যাহতি দিয়া হয় কৰ্মচাৰীসকলক ।
যাৰ বাবে এতিয়া হাহাকাৰ পৰিস্থিতিৰ সৃষ্টি হৈছে কৰ্মচাৰীসকলৰ মাজত । অব্যাহতি দিয়া কৰ্মচাৰীসকলে অভিযোগ কৰা মতে তেওঁলোকে অইন কাম এৰি পৰিবহণ নিগমত যোগদান কৰিছিল । কিন্তু এতিয়া কোনো কাৰণ উল্লেখ নকৰাকৈ চাকৰিৰ পৰা অব্যাহতি দিয়াত সমস্যাত পৰিছে কৰ্মচাৰীসকল ।
তেওঁলোকৰ ভৱিষ্যৎ অনিশ্চয়তাৰ মাজত সোমাই পৰিছে বুলিও উদ্বেগ প্ৰকাশ কৰে কৰ্মচাৰীসকলে । ইফালে কৰ্মচাৰীসকলক অব্যাহতি দি বিমোৰত পৰিছে শিৱসাগৰ জিলা পৰিবহণ নিগম ।
জানিব পৰা মতে অধীক্ষক সত্যজিৎ গগৈয়ে অসম ৰাজ্যিক পৰিবহণ নিগমৰ পৰিচালন সঞ্চালক ৰাহুল দাসৰ নিৰ্দেশনা মতেই এখন ব'ৰ্ড গঠন কৰি বৈধ প্ৰক্ৰিয়াৰে যুৱকসকলক নিযুক্তি দিছিল । কিন্তু কি কাৰণত তেওঁলোকক অব্যাহতি দিবলৈ কোৱা হ'ল তেওঁ নিজেও অজ্ঞাত বুলি প্ৰকাশ কৰিলে অধীক্ষকগৰাকীয়ে । ইফালে পৰিবহণ বিভাগৰ এনে কৰ্মকাণ্ডত ক্ষোভিত হৈ পৰিছে কৰ্মচাৰীসকল (ASTC employees protest against discharge)। বৃহস্পতিবাৰে তেওঁলোকে এই কাৰ্যৰ তীব্ৰ বিৰোধিতা কৰে । লগতে তেওঁলোকক ন্যায় প্ৰদানৰ দাবী উত্থাপন কৰে ।
লগতে পঢ়ক :মাজুলীৰ মুখা শিল্পক অপমান
