আমগুৰি, ২৯ জুলাই : ৰাজ্যৰ লোকনিৰ্মাণ বিভাগৰ চূড়ান্ত গাফিলতিৰ বাবে শিৱসাগৰ জিলাৰ আমগুৰিৰ নামতিত ঐতিহাসিক ধোদৰ আলি বিধ্বস্ত হৈ উঠিছে । ফলত শিৱসাগৰ আৰু নাজিৰা লোকনিৰ্মাণ বিভাগৰ অন্তৰ্গত চামগুৰি ৰজামৈদামৰ পৰা নামতি চাৰিআলি পৰ্যন্ত পথটোত বৃহৎ বৃহৎ গাঁতৰ সৃষ্টি হৈ যাতায়াত ব্যৱস্থা ব্যাহত হৈ উঠিছে ।
উল্লেখ্য যে, ৰাজ্যৰ লোকনিৰ্মাণ বিভাগে ন-কচাৰীৰ পৰা বালিঘাট পৰ্যন্ত পথটো অসম মালাৰ আঁচনিৰ অধীনত সংশ্লিষ্ট ঠিকাদাৰী প্ৰতিষ্ঠানক চমজাই দিয়ে যদিও সংশ্লিষ্ট ঠিকাদাৰী প্ৰতিষ্ঠানে পথটো মেৰামতি নকৰাৰ অভিযোগ উত্থাপন হৈছে । স্থানীয় ৰাইজে উল্লেখ কৰা অনুসৰি, এজাক বৰষুণতে পথটো বিধ্বস্ত হৈ একাঠু বোকা-পানীৰ সৃষ্টি হয় । সদাব্যস্ত পথটোত সৃষ্টি হোৱা বৃহৎ গাঁতৰ বাবেই দুৰ্ঘটনা সংঘটিত হৈ আহিছে ।
যোৱা ছমাহত পথটোত বহুকেইটা দুৰ্ঘটনা সংঘটিত হোৱাৰ লগতে বহুকেইজন লোক মৃত্যুমুখত পৰিছে । বিধ্বস্ত পথটোৰ সোঁ-মাজৰ অংশবিলাকত দ গাঁতৰ সৃষ্টি হোৱাত বৰষুণ দিলে পুখুৰীলৈ পৰ্যবেসিত হয় । পথটোৰ মেৰামতিৰ ক্ষেত্ৰত লোকনিৰ্মাণ বিভাগটোৱে হেমাহি কৰাৰ লগতে ন-কচাৰীৰ পৰা বালিঘাট পৰ্যন্ত পথটো অসম মালাৰ আঁচনিৰ অধীনত সংশ্লিষ্ট ঠিকাদাৰী প্ৰতিষ্ঠানক চমজাই দিয়াৰ সুবিধা লৈ গা এৰা মনোভাৱ দিয়া পৰিলক্ষিত হৈছে ।
স্মতব্য যে, কিছুদিন পূৰ্বে নামতি চাৰিআলিত অসমীয়া যুৱ মঞ্চই ধোদৰ আলি মেৰামতিৰ দাবীত প্ৰতিবাদ সাব্যস্ত কৰিছিল । জাতীয় সংগঠনটোৱে লোকনিৰ্মাণ বিভাগক ১৫ দিনৰ সময়সীমা বান্ধি দি পথটো মেৰামতি নকৰিলে পথ অৱৰোধৰ দৰে কাৰ্যসূচী গ্ৰহণৰ হুংকাৰ দিছিল ।
জাতীয় সংগঠনটোৰ প্ৰতিবাদৰ অন্তত শিৱসাগৰ জিলা প্ৰশাসনৰ তৎপৰতাত লোকনিৰ্মাণ বিভাগটোৱে নামতি চাৰিআলিৰ মাজমজিয়াত কেৱল ৫০ মিটাৰ শিলগুটি পেলাই মেৰামতি কৰি দায়িত্ব সামৰিলে । সম্প্ৰতি পথটো যাতায়াতৰ সম্পূৰ্ণ অনুপযোগী হৈ উঠিছে ।
যিকোনো মুহূৰ্ততে অঘটন সংঘটিত হোৱাৰ আশংকা প্ৰকট হৈ উঠিছে । ফলত স্থানীয় লোকৰ লগতে কৃষক মুক্তি সংগ্ৰাম সমিতি আৰু সদৌ টাই আহোম ছাত্ৰ সন্থাই শীঘ্ৰে পথটো মেৰামতি কৰি যাতায়াতৰ উপযোগী কৰি তুলিবলৈ দাবী জনাইছে । অন্যথা তীব্ৰ প্ৰতিবাদী কাৰ্যসূচী গ্ৰহণৰ হুংকাৰ প্ৰদান কৰে সংগঠনটোৰ সদস্যসকলে ।
লগতে পঢ়ক : 221 new Assam Rifles recruits: অসম ৰাইফলছত ৮১গৰাকী মহিলাসহ ২২১গৰাকীৰ শপতনামা গ্ৰহণ
