আমগুৰি, 27 মে': একাগ্ৰতা, সাধনা আৰু নিষ্ঠাৰে কৰা সকলো কামৰে ফলাফল সদায় ইতিবাচক হয় | তাৰবাবে সুউচ্চ হিমালয়ো বাধাৰ প্ৰাচীৰ হ'ব নোৱাৰে ৷ এই কথাকেই প্ৰমাণ কৰিছে শিৱসাগৰ জিলাৰ গৌৰীসাগৰৰ দৰিদ্ৰ পৰিয়ালৰ ছাত্ৰী জেউতি বড়ীয়ে ৷ পিতৃৰ দৰিদ্ৰতাকো জয় কৰি উচ্চতৰ মাধ্যমিক চূড়ান্ত পৰীক্ষাৰ কলা শাখাত জেউতিয়ে বুটলিছে ঈৰ্ষণীয় সফলতা ৷
সকলো বাধাকো নেওচি উচ্চতৰ মাধ্যমিক চূড়ান্ত পৰীক্ষাত ভাল ফলাফল কৰা জেউতিৰ পিতৃয়ে দিনহাজিৰা কৰি কন্যাক পঢ়াৰ খৰচ আগবঢ়াই আহিছিল ৷ আটাইকেইটা বিষয়ত লেটাৰ নম্বৰ সহ 91.06 নম্বৰ লাভ কৰা কলা শাখাৰ এইগৰাকী ছাত্ৰীয়ে উচ্চশিক্ষা গ্ৰহণ কৰিব গুৱাহাটীৰ কটন কলেজত ৷ কিন্তু জেউতিৰ উচ্চশিক্ষাৰ বাবে অৰ্থৰ প্ৰয়োজন ৷ ভৱিষ্যতে প্ৰশাসনিক বিষয়া হোৱাৰ প্ৰৱল ইচ্ছা থকা জেউতিৰ এতিয়া উচ্চ শিক্ষাৰ কাৰণে প্ৰয়োজন সুধীজনৰ অকণমান বদান্যতা ৷ মাত্ৰ 7 নম্বৰৰ কাৰণে স্থান লাভ নকৰা জেউতিৰ ভৱিষ্যতক লৈ এতিয়া শংকাত ভুগিছে দৰিদ্ৰ পৰিয়ালটো ৷ সেয়ে কোনো সদাসয় ব্যক্তিয়ে যদি জেউতিক সহায় কৰিব বিচাৰে তেনেহ'লে 936584415 নম্বৰত যোগাযোগ কৰিব পাৰে ৷
