শিৱসাগৰ, 27 ডিচেম্বৰ : অসম সাহিত্য সভাৰ গৌৰৱজ্জ্বল ইতিহাসক স্মৰণ কৰাৰ প্ৰয়াসেৰে বুধবাৰৰ পৰা দুদিনীয়া কাৰ্যসূচীৰে শিৱসাগৰৰ বৰ্ডিং খেলপথাৰত শিৱসাগৰ জিলা সাহিত্য সভাৰ উদ্যোগত অসম সাহিত্য সভাৰ 107 সংখ্যক প্ৰতিষ্ঠা দিৱস উদযাপন কৰা হৈছে ৷ আজিৰে পৰা আৰম্ভ হোৱা অসম সাহিত্য সভাৰ 107 সংখ্যক প্ৰতিষ্ঠা দিৱসৰ প্ৰথম কৰ্যসূচী হিচাপে সভাৰ পতাকাসহ 107 খন পতাকা উত্তোলন কৰা হয় ৷
আনহাতে, সভাৰ মূল পতাকা উত্তোলন কৰে শিৱসাগৰ জিলা সাহিত্য সভাৰ সভানেত্ৰী ডঃ নিৰুপমা মহন্তই ৷ সমান্তৰালভাৱে অন্যান্য পতাকাসমূহ জিলাখনৰ একাংশ বিশিষ্ট ব্যক্তিয়ে উত্তোলন কৰে ৷ ইয়াৰ পাছতে অনুষ্ঠিত হয় স্মৃতি তৰ্পণ অনুষ্ঠানৰ ৷ এই অনুষ্ঠান মুকলি কৰে শিক্ষা বিষয়া দেৱজ্যোতি গগৈ, কমল জ্যোতি গগৈ আৰু শিৱসাগৰ চৰকাৰী উচ্চতৰ মাধ্যমিক বিদ্যালয়ৰ অধ্যক্ষ মঞ্জু চেতিয়াই ৷
সমূহীয়া বন্তি প্ৰজ্জ্বলনেৰে আজি সন্ধিয়া প্ৰথম দিনৰ কাৰ্যসূচী সমাপ্তি ঘটিব ৷ ইফালে বৃহস্পতিবাৰে হ’ব লগীয়া দ্বিতীয় দিনৰ কাৰ্যসূচীত উপস্থিত থাকিব ৰাজ্যপাল গুলাপ চান্দ কাটাৰীয়া ৷ দিনৰ 11 বজাত শিৱসাগৰৰ 5,000 গৰাকী ছাত্ৰ-ছাত্ৰীয়ে জাতীয় সংগীত পৰিৱেশন কৰিব বুলি জানিবলৈ দিছে আয়োজক কমিটিয়ে ৷
উক্ত অনুষ্ঠানতে অসম সাহিত্য সভাৰ সভাপতি ডঃ সূর্যকান্ত হাজৰিকা, বিশিষ্ট সাহিত্যিক ডঃ নাহেন্দ্ৰ পাদুন, বিশিষ্ট সাহিত্যিক জয়ন্ত মাধৱ বৰা, বিশিষ্ট লোক-সংস্কৃতিৰ গৱেষক ডঃ অনিল শইকীয়া, শিক্ষামন্ত্ৰী ডাঃ ৰণোজ পেগু, মন্ত্ৰী যোগেন মহন, ৰাজ্যসভাৰ সাংসদ পবিত্ৰ মাৰ্ঘেৰিটা, সাংসদ কামাখ্যা প্ৰসাদ তাছাৰ লগতে বিশিষ্ট ব্যক্তিসকল ৷
এই সন্দৰ্ভত বিশিষ্ট শিক্ষাবিদ ডঃ নাহেন্দ্ৰ পাদুনে কয়, ‘‘ অসম সাহিত্য সভা বুলি ক’লে অসমৰ এনে এক মাত্ৰ অনুষ্ঠান, যিটো জাতি-বৰ্ণ নিৰ্বিশেষে আস্থাৰ অনুষ্ঠান হিচাপে গ্ৰহণ কৰে ৷’’
লগতে পঢ়ক : জাঁজীত সদৌ অসম ভিত্তিক শিশু ভাওনা প্ৰতিযোগিতা
