নলবাৰী, 25 জুনঃ স্ব-নিৰ্ভৰশীল অৰ্থনীতি গঢ়াৰ উদ্দেশ্যেৰে আলফা নেতা জিতেন দত্তৰ উদ্যোগত অলপতে জন্ম লাভ কৰা অৰ্থনৈতিক সংগঠন 'অসম সাৰথি' ৰ পৰা নলবাৰীৰ এজন ক্ষুদ্ৰ ব্যৱসায়ীলৈ আৰ্থিক সাহায্য আগবঢ়ালে আলফা নেতা জিতেন দত্তই । ৰাইজৰ পৰা 20 টকাকৈ বৰঙণি লৈ সংগৃহীত পুঁজিৰ পৰা ২৫০০০ টকাৰ আৰ্থিক সাহায্য আগবঢ়াই নলবাৰী চহৰৰ গৰ্ডন খেলপথাৰৰ সমীপত নতুনকৈ চেলুন ব্যৱসায় আৰম্ভ কৰা খিলঞ্জীয়া যুৱক ৰিংকু তালুকদাৰক ।
'অসম সাৰথি'ৰ পৰা আৰ্থিক সাহায্য লাভ কৰা ৰিংকু তালুকদাৰ প্ৰথমজন যুৱক বুলি সংবাদ মাধ্যমক জানিবলৈ দিয়ে আলফা নেতা গৰাকীয়ে। প্ৰথম পৰ্যায়ত সংগ্ৰহ হোৱা 1 লাখ 40 হাজাৰ টকাৰ বৰঙণিৰে 5 খন জিলাৰ নিবণুৱাক সাহায্য আগবঢ়াব বুলি কয় তেওঁ ৷
ইফালে আলফা-চৰকাৰৰ মাজত চলি থকা শান্তি আলোচনাৰ দাবীক ইতিবাচক বুলি অভিহিত কৰি তেওঁ চৰকাৰে দাবী সমুহ পুৰণ কৰিলে খিলঞ্জীয়া ৰাইজৰ ভৱিষ্যত সুৰক্ষিত হ'ব বুলি মন্তব্য কৰে । লগতে খিলঞ্জীয়া সকলে নিজৰ অধিকাৰ আনিব লাগিলে প্ৰথমতে অৰ্থনৈতিক সংগ্ৰাম আৰম্ভ কৰি বজাৰখন নিজৰ হাতলৈ আনিব লাগিব বুলিও তেওঁ প্ৰকাশ কৰে ৷ তেওঁ কয় যে, মাছ, মাংস কণী আৰু শাক পাচলিৰ বজাৰ খন নিজৰ হাতলৈ আনিলেহে ৰাজ্যৰ অৰ্থনীতি উন্নত হব ৷
ৰাজ্যত বিগত সময়ত কেবাজনো খিলঞ্জীয়া লোক দূৰ্বৃত্তৰ হাতত নিহত হ'বলগীয়া ঘটনাক লৈয়ো তীব্ৰ প্ৰতিক্ৰিয়া ব্যক্ত কৰে আলফা নেতা গৰাকীয়ে ।
লগতে পঢ়কঃ খাদ্য সামগ্ৰীৰ মূল্য বৃদ্ধিয়ে জুৰুলা কৰিছে মহানগৰীয়া জীৱন
