তেজপুৰ,শিৱসাগৰ,নলবাৰী 21ছেপ্টেম্বৰ: সমগ্ৰ ৰাজ্যতে আজিৰে পৰা আৰম্ভ হ'ল বিদ্যালয়ৰ পাঠদান ৷ বিগত 6 টা মাহে বন্ধ হৈ আছিল ৰাজ্যৰ সকলো বিদ্যালয় ৷ আজি ক'ভিড-19ৰ সকলো নিয়ম মানি নৱম, দশম, একাদশ আৰু দাদ্বশ শ্ৰেণীৰ পাঠদান আৰম্ভ হয় ৷
তেজপুৰ চহৰতো অসম চৰকাৰৰ স্বাস্থ্য আৰু শিক্ষা বিভাগৰ মন্ত্ৰী ডঃ হিমন্ত বিশ্ব শৰ্মাৰ নিৰ্দেশ অনুসৰি আৰম্ভ হয় পাঠদান ৷ স্বাস্থ্য বিভাগে প্ৰৱৰ্তন কৰা ৰাজ্য চৰকাৰৰ SOP অনুসৰি বিদ্যালয়সমূহৰ নৱম আৰু দশম শ্ৰেণীৰ ছাত্ৰ-ছাত্ৰী সকলক প্ৰদান কৰা হ'ব শিক্ষা । পাঠদান আৰম্ভ হোৱাৰ প্ৰথম দিনটোতে তেজপুৰ কলেজিয়েট হাইস্কুলত উপস্থিত হয় মুঠ ১১ গৰাকী ছাত্ৰ-ছাত্ৰী ৷
ইফালে, ৰাজ্যৰ অন্য প্ৰান্তৰ সমান্তৰালকৈ শিৱসাগৰ জিলাৰ চৰকাৰী উচ্চতৰ মাধ্যমিক বহুমুখী বিদ্যালয়তো আৰম্ভ হয় পাঠদান প্ৰক্ৰিয়া ৷ বিদ্যালয়খনত অভিভাৱকৰ পৰা আপত্তিবিহীন পত্ৰ লৈ শ্ৰেণী কোঠাত উপস্থিত হয় একাংশ ছাত্ৰ ৷ বিদ্যালয়দ্বাৰত থাৰ্মেল তাপমান জোখা যন্ত্ৰৰ দ্বাৰা শৰীৰৰ তাপমান জুখি বিদ্যালয়ত প্ৰৱেশৰ ব্যৱস্থা কৰাৰ লগতে হাত ধোৱাৰ যথোচিত ব্যৱস্থা কৰা হয় । কৰ'ণা ভাইৰাছক প্ৰতিৰোধ কৰিবলৈ বিদ্যালয়ৰ কৰ্তৃপক্ষৰ দ্ধাৰা সকলো ব্যৱস্থা কৰা হয় যদিও বিদ্যালয়খনত উপস্থিত হোৱা একাংশ শিক্ষাৰ্থী শংকিত হৈ পৰে ৷ ইফালে, ছাত্ৰাৱাস সমূহ নোখোলাৰ বাবে বিদ্যালয়ত উপস্থিত হ'ব নোৱাৰে একাংশ ছাত্ৰ ৷
অন্য এক খবৰৰ বাবে: ৰিপুন বৰাসহ সংসদৰ 7 সদস্যক এসপ্তাহৰ বাবে সদনৰ পৰা বহিস্কাৰ
প্ৰায় 6 মাহৰ অন্তত নলবাৰী জিলাৰ বিদ্যালয় সমূহতো আৰম্ভ হয় পাঠদান প্ৰক্ৰিয়া ৷ ক'ভিড-19ৰ সকলো নিয়ম মানি জিলাখনৰ আন বিদ্যালয়সমূহৰ সমান্তৰালকৈ জিলাখনৰ চৰকাৰী গৰ্ডন উচ্চতৰ মাধ্যমিক বিদ্যালয়টো নৱম আৰু একাদশ শ্ৰেণীৰ পাঠদান আৰম্ভ হয় ৷ বিদ্যালয়খনত ক'ভিড-19ৰ নীতি-নিয়ম সমূহ পালন কৰা হৈছে নে নাই এই সন্দৰ্ভত বিদ্যালয়খন পৰিদৰ্শন কৰে জিলাখনৰ উপায়ুক্ত পূৰবী কোঁৱৰে ৷
