নলবাৰী,২৩ জুন: নলবাৰীৰ মুকালমুৱাত সংঘটিত এক কৰুণ ঘটনা । প্ৰাতঃভ্ৰমণলৈ আহি উন্মুক্ত বৈদ্যুতিক ট্ৰেঞ্চফৰ্মাৰৰ তলত থকা পানী স্পৰ্শ কৰি কৰুণ মৃত্যুক সাবতিলে এগৰাকী TET শিক্ষকে(Teacher death in electrocuted in electric transformer) । শিক্ষকগৰাকীৰ মৃত্যুত অঞ্চলজুৰি বৈছে শোকৰ বন্যা ।
মুকালমুৱাৰ ঘোৰাথালত সংঘটিত হৈছে এই শোকাৱহ ঘটনাটো । বৰপেটা জিলাৰ মন্দিয়া শিক্ষাখণ্ডৰ অন্তৰ্গত গুৰলা প্ৰাথমিক বিদ্যালয়ৰ শিক্ষক ভৱেশ দাস নামৰ লোকজনে আনদিনাৰ দৰেই বৃহস্পতিবাৰেও প্ৰাতঃভ্ৰমণলৈ ওলাই আহে । কিন্তু হঠাৎ মুগদি-ৰামপুৰ পথৰ ঘোঁৰাথালৰ এটি উন্মুক্ত বৈদ্যুতিক ট্ৰেঞ্চফৰ্মাৰৰ তলত থকা পানীৰ স্পৰ্শলৈ অহাত বিদ্যুৎস্পৃষ্ট হৈ মৃত্যু হয় লোকজনৰ ।
অত্যন্ত অমায়িক স্বভাৱৰ শিক্ষক ভৱেশ দাসৰ কৰুণ মৃত্যুত শোকস্তব্ধ হৈ পৰিছে ঘোঁৰাথাল গাঁৱৰ ৰাইজ । শিক্ষকগৰাকীৰ মৃত্যুৰ বাবে বিদ্যুৎ বিভাগক জগৰীয়া কৰে স্থানীয় ৰাইজে । উল্লেখ্য যে ইয়াৰ পূৰ্বেও উন্মুক্ত বৈদ্যুতিক ট্ৰেঞ্চফৰ্মাৰটোৱে ভাবুকি কঢ়িয়াই আনিছিল গাঁওখনৰ ৰাইজৰ পশুধনলৈ ।
ইফালে ভৱেশ দাসৰ মৃত্যুত কান্দোনৰ ৰোল উঠিছে পৰিয়ালটোৰ মাজত । এটি এবছৰীয়া কন্যা সন্তানৰ পিতৃ ভৱেশ দাসৰ মৃত্যুত কান্দোনত ভাগি পৰিছে পত্নীসহ পৰিয়ালৰ লোক । শীঘ্ৰে ট্ৰেঞ্চফৰ্মাৰটোৰ বিসংগতি দুৰ কৰি অঞ্চলটোৰ ৰাইজৰ জীৱনৰ সুৰক্ষা নিশ্চিত কৰিবলৈ আহ্বান জনাই স্থানীয় ৰাইজে ।
লগতে পঢ়ক: Assam Floods: মিছামাৰীৰ বঙালগাঁৱত গাভৰু নৈৰ ব্যাপক খহনীয়া
